Kúni keshe Qazaqstanda Alem Crypto Fund kriptoqory óz jumysyn bastady. Qor Jasandy intellekt jáne tsifrlyq damý ministrliginiń bastamasymen qurylyp, Qazaqstan Venture Group basqarýyna berildi jáne Astana halyqaralyq qarjy ortalyǵynyń (AHQO) ekojúiesinde tirkeldi, dep habarlaidy Dalanews.kz.
Qordyń basty maqsaty - tsifrlyq aktivterge uzaq merzimdi investitsiia salyp, qarjy rezervin qalyptastyrý. Quzyrly vedomstvo bolashaqta Alem Crypto Fund memlekettik jinaqtardy basqarýǵa arnalǵan quralǵa ainalyp, elimizdiń qarjylyq bolashaǵyn tiimdi basqarý múmkindigin keńeite alatynyn aitady.
"Alem Crypto Fund qorynyń qurylýy - Qazaqstandaǵy tsifrlyq qarjy salasyn damytý jolyndaǵy mańyzdy qadam. Bizdiń maqsatymyz - ony iri investorlar úshin senimdi quralǵa jáne memlekettik tsifrlyq rezervterdiń negizine ainaldyrý", - deidi premer-ministrdiń orynbasary – Jasandy intellekt jáne tsifrlyq damý ministri Jaslan Mádiev.
Qordyń strategiialyq seriktesi - álemdegi tsifrlyq aktiv ekojúiesi salasyndaǵy iri oiynshy Binance Kazakhstan. Dál osy Binance Kazakhstan-men seriktestikte Alem Crypto Fund óziniń alǵashqy investitsiiasyn júzege asyryp, eń turaqty ári yqpaldy tsifrlyq aktivterdiń biri - BNB tokenin satyp aldy. BNB - bul BNB Chain jelisiniń negizgi tokeni. Ol tranzaktsiia júrgizý, komissiia tóleý jáne jelini basqarýǵa qatysý úshin qoldanylady. Búginde BNB-diń naryqtyq kapitalizatsiiasy 138 milliard AQSh dollarynan asady.
Degenmen atalǵan qorǵa qatysty mamandarda suraq bar, iaǵni olar bul aradan aiqyn qaýip-qaterdi kórip otyr. Qandai deisizder me? Máselen, ekonomist Eldar Shamsýtdinov qordyń strategiialyq áriptesi Binance Kazakhstan ekenine jáne alǵashqy investitsiialyq qordyń BNB tokenin satyp alýyna basa nazar aýdarady.
"Qordy memlekettik dep jatyr ǵoi, biraq quqyqtyq turǵydan alǵanda, tipti resmi qoldaýǵa ie bolsa da ol - jekemenshik qurylym. Alǵash bolyp satyp alǵan BNB tokeni de suraq týdyrady. Óitkeni ol BTC nemese ETH siiaqty ámbebap rezervtik aktiv emes, kerisinshe Binance-tyń turaqtylyǵy men onyń retteletin táýekelderine bailanǵan token. Sonda deimin de, memlekettik rezerv dep aityp jatqandarynyń arǵy jaǵynan, bir jekemenshik jobaǵa tigilgen básti ǵana kórýge bolady. Al mundai qadam naqty bir korporatsiiaǵa táýeldilikti arttyryp, táýekelderdi bir jerge shoǵyrlandyrady", - deidi ol.
Al ekonomist Rýslan Sultanov bul Qazaqstan úshin synaq kezeńi ekenin eskerý kerektigin aitady.
"Árine, mundai qadam (jekemenshik tokendi satyp alý) diversifikatsiialanǵan strategiiadan góri, bir korporatsiia jetistigine tigilgen bás sekildi kórinedi. Alaida Qazaqstan bul baǵytta ár nárseni baiqastap kórýde: aqyrynda jańa qarjylyq infraqurylymǵa jol ashady, ne ulttyq rezervter jalǵyz jekemenshik tokenniń ainalasynda boi túzei almaitynyna kóz jetkizedi", - deidi maman.
Buǵan deiin teńgege bailanǵan alǵashqy steiblkoin ainalymǵa engizilgenin jazǵanbyz. Ulttyq Bank tóraǵasy Timýr Súleimenovtiń aitýynsha, jańa qural kriptovaliýtalardy aqshaǵa almastyrýdy yńǵaily etip, arnaiy kartalar arqyly saýda jasaýǵa múmkindik beredi.
