Qaraǵandy oblysy Qazaqstanda alǵash ret buqaralyq is-sharalar kezinde qoǵamdyq qaýipsizdikti qamtamasyz etý úshin jasandy intellekt tehnologiialarymen jabdyqtalǵan qyzmettik robot itti paidalanǵan óńir atandy, dep habarlaidy dalanews.kz.
17-18 shilde kúnderi Balqash jáne Temirtaý qalalarynda ótken merekelik is-sharalarǵa 115 myńnan asa adam qatysty. Azamattardyń qaýipsizdigin qamtamasyz etý maqsatynda Qaraǵandy oblysy Politsiia departamentiniń jeke quramy kúsheitilgen rejimge kóshirilip, qoǵamdyq tártipti kúzetýge myńnan asa politsiia qyzmetkeri jumyldyryldy.
Is-sharalardyń basty jańalyǵy jasandy intellekt júiesimen jabdyqtalǵan qyzmettik robot it boldy. Ol naqty ýaqyt rejiminde politsiianyń izdeýinde nemese baqylaýynda júrgen adamdardy bet-beinesi arqyly avtomatty túrde anyqtai alady. Bul quqyqbuzýshylyqtardyń aldyn alý, kúdikti tulǵalardy jedel anyqtaý jáne politsiianyń áreket etý tiimdiligin edáýir arttyrýǵa múmkindik beredi.
Qyzmet barysynda robot it kómegimen tórt quqyq buzýshy anyqtalǵan. Olardyń qatarynda aliment tóleýden jaltaryp júrgen bir adam, memleket aldyndaǵy bereshegi bar eki boryshker jáne sot belgilegen shekteýdi buzyp, turǵyn úiinen tys jerde júrgen, buryn sottalǵan adam bar.
"Barlyǵyna qoldanystaǵy zańnamaǵa sáikes tiisti sharalar qabyldandy", - dedi politsiia.
