Qazaqstanda 2026 jyly aldaǵy jylytý maýsymyna daiyndyq aiasynda energetikalyq nysandardy kúrdeli jóndeýge 384 mlrd teńge baǵyttaldy. Bul ótken jylmen salystyrǵanda 9 paiyz kóp, dep habarlaidy dalanews.kz.
Úkimettiń málimetinshe, 2025 jyly el boiynsha 10 energiia blogy, 63 qazandyq jáne 39 týrbina jóndelgen. Sonymen qatar 17 myń shaqyrym elektr berý jelisi, 420 qosalqy stansa jáne tozyǵy jetken 323 shaqyrym jylý jelisi jańartylǵan.
Júrgizilgen jumystardyń nátijesinde elektr stansalary jabdyqtarynyń ortasha tozý deńgeii 53%-ǵa, jylý jelileriniki 50%-ǵa, al elektr jelisi nysandaryniki 66,2%-ǵa deiin tómendegen. Sondai-aq táýekeli joǵary «qyzyl» aimaqtan bes jylý elektr ortalyǵy "sary" aimaqqa, al taǵy úsh JEO "sarydan" "jasyl" aimaqqa aýystyrylǵan.
Biylǵy qysqa daiyndyq úshin qoimalarda qazirdiń ózinde 3,5 mln tonna kómir men 143 myń tonna mazýt jinalǵan. Jalpy halyq pen kommýnaldyq sektordy qamtamasyz etý úshin 7,3 mln tonna kómir daiyndalady.
Úkimettiń habarlaýynsha, 15 tamyzdan bastap Respýblikalyq shtab kómir tasymalyn tsifrlyq júie arqyly baqylaýǵa kirisedi.
"15 tamyzdan bastap Respýblikalyq shtab kómirdiń ken oryndarynan óńirlerdegi tuiyqtarǵa deiin jetkizilýin tsifrlyq formatta baqylaidy. Bul alypsatarlyqtyń aldyn alyp, jasandy kómir tapshylyǵyna jol bermeýge múmkindik beredi", - dep habarlady Úkimettiń baspasóz qyzmeti.
