Eldiń agrarlyq sektorynda óndiristi jańǵyrtýǵa, qaita óńdeýdi keńeitýge jáne azyq-túlik qaýipsizdigin nyǵaitýǵa baǵyttalǵan birqatar negizgi baǵdarlamalar júzege asyrylýda, dep habarlaidy Dalanews.kz.
Memlekettik qoldaýdyń negizgi baǵyttarynyń biri – egis jáne jinaý naýqanyna jeńildetilgen qarjylandyrý bolyp otyr.
2025 jyly bul maqsattarǵa 700 mlrd teńge bólingen, jyldyq mólsherleme – 5%. Qarjylandyrý 2024 jyldyń qarashasynda bastalǵan, bul agrariiler sanyn 3,5 myńnan 14 myńǵa deiin arttyrýǵa múmkindik berdi. Qarajat tyńaitqysh, tuqym, ósimdikterdi qorǵaý quraldary, JJM satyp alýǵa jáne eńbek aqysyn tóleýge baǵyttalady.
Búgingi tańda 500 mlrd teńgege 7 546 ótinim túsip, onyń ishinde 7 490 aýyl sharýashylyǵy taýaryn óndirýshi qarjylandyrylyp, 7,8 mln gektar egistik jer qamtyldy.
Sonymen qatar, otandyq óndiristegi aýyl sharýashylyǵy tehnikasyna jeńildetilgen lizing baǵdarlamasy iske asyrylýda. Qarjylandyrý kólemi – 250 mlrd teńge, jyldyq mólsherleme – 5%. 2025 jyldyń aqpanynan bastap 141,8 mlrd teńgege 3 387 lizing sharty jasaldy. Osy arqyly 6 614 birlik tehnika satyp alynbaq. Jyl qorytyndysy boiynsha aýyl sharýashylyǵy tehnikasy parkiniń keminde 6,5%-y jańarýy josparlanyp otyr.
Aýyl sharýashylyǵy ónimderin óńdeý tiimdiligin arttyrý úshin óńdeýshi kásiporyndarǵa ainalym qarajatyn tolyqtyrýǵa jeńildetilgen nesie berý bastaldy. Bul maqsatqa 44,3 mlrd teńgeden astam qarajat bólingen, jyldyq mólsherleme – 5%. Qazirdiń ózinde 14,4 mlrd teńgege 30 joba qarjylandyryldy, júzden astam ótinim qaralýda.
Sonymen birge, bordaqylaý alańdaryna erekshe kóńil bólinýde. Olardy qoldaýǵa shamamen 50 mlrd teńge qarastyrylǵan. Qarajat mal, jem-shóp, JJM satyp alýǵa baǵyttalady. Baǵdarlamaǵa qatysý úshin bordaqylaý infraqurylymy bolýy jáne IQM men UQM mal basy ISJ-de tirkelýi qajet. Qazirgi ýaqytta 18,7 mlrd teńgege 33 ótinim boiynsha qujattar jinalýda.
Soltústik Qazaqstan oblysynyń tájiribesin taratý baǵdarlamasy da jalǵasýda. Onyń ereksheligi – jyldyq 2,5% jeńildetilgen mólsherleme jáne agrosektordy damytýdyń keshendi tásili. 2023–2024 jyldary 163 joba qarjylandyryldy, sonyń ishinde 48 sút-taýar fermasy iske qosylyp, sút óndirisi jylyna 300 myń tonnaǵa artty. 2025 jyly 17 óńirde qus sharýashylyǵy, etti mal sharýashylyǵy jáne ónimdi tereń óńdeýdi qamtityn 13 basym baǵyt boiynsha 141 investitsiialyq jobany qarjylandyrý kózdelip otyr.
Bul baǵyttaǵy júieli jumys eldiń azyq-túlik qaýipsizdigin nyǵaityp qana qoimai, joǵary qosylǵan quny bar otandyq ónimniń eksporttyq áleýetin aitarlyqtai arttyrýǵa múmkindik beredi.
