ەلدىڭ اگرارلىق سەكتورىندا ءوندىرىستى جاڭعىرتۋعا، قايتا وڭدەۋدى كەڭەيتۋگە جانە ازىق-تۇلىك قاۋىپسىزدىگىن نىعايتۋعا باعىتتالعان ءبىرقاتار نەگىزگى باعدارلامالار جۇزەگە اسىرىلۋدا، دەپ حابارلايدى Dalanews.kz.
مەملەكەتتىك قولداۋدىڭ نەگىزگى باعىتتارىنىڭ ءبىرى – ەگىس جانە جيناۋ ناۋقانىنا جەڭىلدەتىلگەن قارجىلاندىرۋ بولىپ وتىر.
2025 جىلى بۇل ماقساتتارعا 700 ملرد تەڭگە بولىنگەن، جىلدىق مولشەرلەمە – 5%. قارجىلاندىرۋ 2024 جىلدىڭ قاراشاسىندا باستالعان، بۇل اگرارييلەر سانىن 3،5 مىڭنان 14 مىڭعا دەيىن ارتتىرۋعا مۇمكىندىك بەردى. قاراجات تىڭايتقىش، تۇقىم، وسىمدىكتەردى قورعاۋ قۇرالدارى، ججم ساتىپ الۋعا جانە ەڭبەك اقىسىن تولەۋگە باعىتتالادى.
بۇگىنگى تاڭدا 500 ملرد تەڭگەگە 7 546 ءوتىنىم ءتۇسىپ، ونىڭ ىشىندە 7 490 اۋىل شارۋاشىلىعى تاۋارىن ءوندىرۋشى قارجىلاندىرىلىپ، 7،8 ملن گەكتار ەگىستىك جەر قامتىلدى.
سونىمەن قاتار، وتاندىق وندىرىستەگى اۋىل شارۋاشىلىعى تەحنيكاسىنا جەڭىلدەتىلگەن ليزينگ باعدارلاماسى ىسكە اسىرىلۋدا. قارجىلاندىرۋ كولەمى – 250 ملرد تەڭگە، جىلدىق مولشەرلەمە – 5%. 2025 جىلدىڭ اقپانىنان باستاپ 141،8 ملرد تەڭگەگە 3 387 ليزينگ شارتى جاسالدى. وسى ارقىلى 6 614 بىرلىك تەحنيكا ساتىپ الىنباق. جىل قورىتىندىسى بويىنشا اۋىل شارۋاشىلىعى تەحنيكاسى پاركىنىڭ كەمىندە 6،5%-ى جاڭارۋى جوسپارلانىپ وتىر.
اۋىل شارۋاشىلىعى ونىمدەرىن وڭدەۋ تيىمدىلىگىن ارتتىرۋ ءۇشىن وڭدەۋشى كاسىپورىندارعا اينالىم قاراجاتىن تولىقتىرۋعا جەڭىلدەتىلگەن نەسيە بەرۋ باستالدى. بۇل ماقساتقا 44،3 ملرد تەڭگەدەن استام قاراجات بولىنگەن، جىلدىق مولشەرلەمە – 5%. ءقازىردىڭ وزىندە 14،4 ملرد تەڭگەگە 30 جوبا قارجىلاندىرىلدى، جۇزدەن استام ءوتىنىم قارالۋدا.
سونىمەن بىرگە، بورداقىلاۋ الاڭدارىنا ەرەكشە كوڭىل بولىنۋدە. ولاردى قولداۋعا شامامەن 50 ملرد تەڭگە قاراستىرىلعان. قاراجات مال، جەم-شوپ، ججم ساتىپ الۋعا باعىتتالادى. باعدارلاماعا قاتىسۋ ءۇشىن بورداقىلاۋ ينفراقۇرىلىمى بولۋى جانە ءىقم مەن ۇقم مال باسى يسج-دە تىركەلۋى قاجەت. قازىرگى ۋاقىتتا 18،7 ملرد تەڭگەگە 33 ءوتىنىم بويىنشا قۇجاتتار جينالۋدا.
سولتۇستىك قازاقستان وبلىسىنىڭ تاجىريبەسىن تاراتۋ باعدارلاماسى دا جالعاسۋدا. ونىڭ ەرەكشەلىگى – جىلدىق 2،5% جەڭىلدەتىلگەن مولشەرلەمە جانە اگروسەكتوردى دامىتۋدىڭ كەشەندى ءتاسىلى. 2023–2024 جىلدارى 163 جوبا قارجىلاندىرىلدى، سونىڭ ىشىندە 48 ءسۇت-تاۋار فەرماسى ىسكە قوسىلىپ، ءسۇت ءوندىرىسى جىلىنا 300 مىڭ تونناعا ارتتى. 2025 جىلى 17 وڭىردە قۇس شارۋاشىلىعى، ەتتى مال شارۋاشىلىعى جانە ءونىمدى تەرەڭ وڭدەۋدى قامتيتىن 13 باسىم باعىت بويىنشا 141 ينۆەستيسيالىق جوبانى قارجىلاندىرۋ كوزدەلىپ وتىر.
بۇل باعىتتاعى جۇيەلى جۇمىس ەلدىڭ ازىق-تۇلىك قاۋىپسىزدىگىن نىعايتىپ قانا قويماي، جوعارى قوسىلعان قۇنى بار وتاندىق ءونىمنىڭ ەكسپورتتىق الەۋەتىن ايتارلىقتاي ارتتىرۋعا مۇمكىندىك بەرەدى.
