Qazaqstanda qylmys álemine qatysy bar 27 adam ustaldy, dep habarlaıdy Dalanews.kz İİM baspasóz qyzmetine siltep. 

İshki ister mınıstrliginiń málimetinshe, sońǵy eki jylda uıymdasqan qylmystyq toptardy qurý, basqarý jáne olarǵa qatysý faktileri boıynsha 120-dan astam qylmystyq is tirkeldi, sonyń ishinde 13-i transulttyq qylmystyq toptarǵa qatysty. Qylmystyq kodekstiń ártúrli baptary boıynsha 600-den astam qylmysker jaýapkershilikke tartylǵan. 

Halyqaralyq izdestirýde bolǵan uıymdasqan qylmystyq toptardyń 27 múshesi, ıaǵnı «qylmys áleminiń serkeleri» ustaldy.

Jaqyn shet elderden kelgen alty «zańdaǵy urynyń» Qazaqstan aýmaǵynda bolýynyń aldyn alyndy. Bopsalaý jáne basqa da aýyr qylmystardy jasaǵan 160 qylmystyq toptyń zańsyz áreketi toqtatyldy.

Bopsalaý faktileri boıynsha barlyǵy 1300-den astam qylmystyq is qozǵaldy. 400-den astam adam saýdasymen baılanysty qylmys anyqtaldy.