Qazaqstan aýmaǵyn geologiialyq zertteý jalǵasýda. Qazirgi ýaqytta 2024 jylǵy jaǵdai boiynsha, zertteý jumystary 2014,4 myń sharshy shaqyrym aýmaqty qamtydy. 2024 jyly atqarylǵan jumystardyń nátijesi boiynsha qatty paidaly qazbalar men kómirsýtekterdi óndirý úshin áleýeti joǵary 38 ýchaske tabyldy, dep habarlaidy Dalanews.kz.
Úkimettiń baspasóz qyzmetiniń habarlaýynsha, sirek jer metaldarynyń boljamdy resýrstary 2,6 mln tonna, qońyr kómir – 1,1 mlrd tonna, mys jáne nikel – 3,7 mln tonna, altyn – 19 tonna jáne basqa da paidaly qazbalar bar. Byltyr aiaqtalǵan jobalar boiynsha kartaǵa túsirilgen aýmaqtyń jalpy aýdany 104,4 myń sharshy shaqyrymdy qurady.
2024–2026 jyldarǵa arnalǵan bul jumystardy qarjylandyrýdyń jalpy somasy 22,830 mlrd teńgeni quraidy, onyń ishinde 2025 jyly 7,636 mlrd teńge, 2026 jyly – 7,865 mlrd teńge kózdelgen.
2025 jyly 1:200 000 masshtabtaǵy óńirlik jobalar iske asyrylýda:
- tereń geologiialyq kartaǵa túsirý – 14 nysan,
- geologiialyq-mineragendik kartaǵa túsirý – 7 nysan,
- gidrogeologiialyq jete zertteý – 19 nysan.
Mineraldy-shikizat bazasyn damytý jeke investitsiialarmen belsendi qoldaý tabady. 2018-2024 jyldary qatty paidaly qazbalardy geologiialyq barlaýǵa shamamen 424 mlrd teńge salyndy. Tek 2024 jyly investitsiia kólemi 99,1 mlrd teńgeni qurady, 2025 jyly 106 mlrd teńgege deiin ósedi dep boljanýda.
Qoldanystaǵy erejeler boiynsha jeke tulǵalar jer qoinaýyn geologiialyq zertteýdi jeńildetilgen litsenziia boiynsha úsh jyl merzimge júrgize alady. Litsenziialyq júie memleketke birjolǵy aqy tóleýdi – 50 AEK mólsherindegi qol qoiý bonýsyn tóleýdi, jumys kólemi boiynsha naqty eń tómengi talaptardyń bolmaýyn, sonymen qatar ýchaskege airyqsha quqyqtardyń bolmaýyn kózdeidi. Geologiialyq túsirý jáne geofizikalyq jumystar, sondai-aq jerasty sýlaryn barlaý jáne baǵalaý jumystary júrgizýge ruqsat etiledi. Geologiialyq aqparat Ónerkásip jáne qurylys ministrliginiń Geologiia komitetine eseptilikti mindetti túrde bergen kezde jer qoinaýyn paidalanýshynyń menshigi bolyp qalady. Zańnamaǵa sáikes aqparattyń qupiia saqtalý merzimi bes jyldy quraidy.
2019 jyldan 2024 jylǵa deiin jer qoinaýyn geologiialyq zertteýge 306 litsenziia berildi, onyń 55-i - 2024 jyly.
