قازاقستان اۋماعىن گەولوگيالىق زەرتتەۋ جالعاسۋدا. قازىرگى ۋاقىتتا 2024 جىلعى جاعداي بويىنشا، زەرتتەۋ جۇمىستارى 2014،4 مىڭ شارشى شاقىرىم اۋماقتى قامتىدى. 2024 جىلى اتقارىلعان جۇمىستاردىڭ ناتيجەسى بويىنشا قاتتى پايدالى قازبالار مەن كومىرسۋتەكتەردى ءوندىرۋ ءۇشىن الەۋەتى جوعارى 38 ۋچاسكە تابىلدى، دەپ حابارلايدى Dalanews.kz.
ۇكىمەتتىڭ باسپا ءسوز قىزمەتىنىڭ حابارلاۋىنشا، سيرەك جەر مەتالدارىنىڭ بولجامدى رەسۋرستارى 2،6 ملن توننا، قوڭىر كومىر – 1،1 ملرد توننا، مىس جانە نيكەل – 3،7 ملن توننا، التىن – 19 توننا جانە باسقا دا پايدالى قازبالار بار. بىلتىر اياقتالعان جوبالار بويىنشا كارتاعا تۇسىرىلگەن اۋماقتىڭ جالپى اۋدانى 104،4 مىڭ شارشى شاقىرىمدى قۇرادى.
2024–2026 جىلدارعا ارنالعان بۇل جۇمىستاردى قارجىلاندىرۋدىڭ جالپى سوماسى 22،830 ملرد تەڭگەنى قۇرايدى، ونىڭ ىشىندە 2025 جىلى 7،636 ملرد تەڭگە، 2026 جىلى – 7،865 ملرد تەڭگە كوزدەلگەن.
2025 جىلى 1:200 000 ماسشتابتاعى وڭىرلىك جوبالار ىسكە اسىرىلۋدا:
- تەرەڭ گەولوگيالىق كارتاعا ءتۇسىرۋ – 14 نىسان،
- گەولوگيالىق-مينەراگەندىك كارتاعا ءتۇسىرۋ – 7 نىسان،
- گيدروگەولوگيالىق جەتە زەرتتەۋ – 19 نىسان.
مينەرالدى-شيكىزات بازاسىن دامىتۋ جەكە ينۆەستيسيالارمەن بەلسەندى قولداۋ تابادى. 2018-2024 جىلدارى قاتتى پايدالى قازبالاردى گەولوگيالىق بارلاۋعا شامامەن 424 ملرد تەڭگە سالىندى. تەك 2024 جىلى ينۆەستيسيا كولەمى 99،1 ملرد تەڭگەنى قۇرادى، 2025 جىلى 106 ملرد تەڭگەگە دەيىن وسەدى دەپ بولجانۋدا.
قولدانىستاعى ەرەجەلەر بويىنشا جەكە تۇلعالار جەر قويناۋىن گەولوگيالىق زەرتتەۋدى جەڭىلدەتىلگەن ليسەنزيا بويىنشا ءۇش جىل مەرزىمگە جۇرگىزە الادى. ليسەنزيالىق جۇيە مەملەكەتكە ءبىرجولعى اقى تولەۋدى – 50 اەك مولشەرىندەگى قول قويۋ بونۋسىن تولەۋدى، جۇمىس كولەمى بويىنشا ناقتى ەڭ تومەنگى تالاپتاردىڭ بولماۋىن، سونىمەن قاتار ۋچاسكەگە ايرىقشا قۇقىقتاردىڭ بولماۋىن كوزدەيدى. گەولوگيالىق ءتۇسىرۋ جانە گەوفيزيكالىق جۇمىستار، سونداي-اق جەراستى سۋلارىن بارلاۋ جانە باعالاۋ جۇمىستارى جۇرگىزۋگە رۇقسات ەتىلەدى. گەولوگيالىق اقپارات ونەركاسىپ جانە قۇرىلىس مينيسترلىگىنىڭ گەولوگيا كوميتەتىنە ەسەپتىلىكتى مىندەتتى تۇردە بەرگەن كەزدە جەر قويناۋىن پايدالانۋشىنىڭ مەنشىگى بولىپ قالادى. زاڭناماعا سايكەس اقپاراتتىڭ قۇپيا ساقتالۋ مەرزىمى بەس جىلدى قۇرايدى.
2019 جىلدان 2024 جىلعا دەيىن جەر قويناۋىن گەولوگيالىق زەرتتەۋگە 306 ليسەنزيا بەرىلدى، ونىڭ 55ء-ى - 2024 جىلى.
