2026 jyldyń 1 qańtarynan bastap elektromobilder qymbattaidy. Óitkeni oǵan qatysty osyǵan deiin qoldanysta bolǵan tariftik jeńildikter óz kúshin joiady, dep habarlaidy Dalanews.kz.
Bul týraly QR Qarjy ministrligi Memlekettik kirister komiteti eskertedi.
QR Qarjy ministrliginiń Memlekettik kirister komiteti elimizge ákelinetin elektromobil kólemine qatysty tariftik jeńildikterdi belgileýde belgili bir kvotany belgilegen. Qazir biz sol mejeni igerý alýdyndamyz.
- Keden odaǵy komissiiasynyń 2009 jylǵy 27 qarashadaǵy №130 sheshimine sáikes, elektromobilderge (TN VED kody 8703 80 000 2) ákelý kezinde tariftik jeńildik qarastyrylǵan. Sonymen qatar, osy sheshimmen Qazaqstan Respýblikasyna ákelýge arnalǵan kvota belgilengen – 15 000 birlik.
- 2025 jylǵy 25 qyrkúiektegi jaǵdai boiynsha, elimizge 13 000-nan astam elektromobil ákelindi, bul belgilengen limittiń 87,2%-yn quraidy.
- Osylaisha, tariftik jeńildikti qoldaný arqyly ákelýge 1 900-dan az elektromobil múmkindigi qaldy.
Onyń ústine jańa Salyq kodeksiniń qoldanys merzimi taiap qaldy. Osy jaǵynan alǵanda, 2026 jyly 1 qańtardan bastap elimizge ákelinetin elektromobilderge qatysty jeńildik óz kúshin joiady.
QAZAQSTANDA QANShA ELEKTROKAR JÚITKIP JÚR?
Jalpy, statistikaǵa súiensek, Energyprom portalynyń málimeti boiynsha, 2025 jyldyń tamyz aiynyń basynda elimizde 19,1 myń elektrokar tirkelgen,bul - ótken jylmen salystyrǵanda 79%-ǵa artyq kórsetkish. 2025 jyldyń alǵashqy jeti aiynyń ózinde el azamattary 6,9 myń "batareiamen jumys isteitin" kólikti esepke qoidy, degenmen bul elimizde tirkelgen barlyq avtokólikterdiń 0,7%-yn ǵana quraidy.
Elektromobilder kóp júitkip júrgen óńirdiń biregeii — Almaty. Munda 11,3 myń osyndai kólik túri nemese qazaqstandyq elektrokar parkiniń 60%-y shoǵyrlanǵan. Ońtústik astanada olardyń úlesi barlyq tirkelgen kólikterdiń 1,6%-na jetedi. Astanada 2,2 myń (qalalyq avtoparktiń 0,5%), Almaty oblysynda 1,2 myń (0,2%) elektrokar bar.
2026 JYLY BAǴA QANShAǴA QYMBATTAIDY?
Bul rette,inbusiness portalynyń esepteýinshe, kedendik qunyna qarai ekologiialyq taza kólik 16%–dan 31%-ǵa deiin qymbattaýy múmkin:
- EAEO-nyń biryńǵai kedendik tarifi boiynsha baj - 15%, endi oǵan 16% QQS-ti qosyńyz. Sonda qymbattaý paiyzdyq mólsherlemede 31%-dy quraidy.
- DSU mólsherlemeleri boiynsha baj - 0%, biraq 16%-dyq QQS mindetti bolyp sanalady.
