Qazaqstanda 12 jyldyq bilim berý baǵdarlamasyn 11 jylǵa syiǵyzý múmkindigi qarastyrylady. Bul týraly Úkimettegi brifingte oqý-aǵartý ministri Juldyz Súleimenova málimdedi, dep habarlaidy dalanews.kz.
Másele 12 jyl oqityn Nazarbaev ziiatkerlik mektepterindegi bilim berý júiesin talqylaý kezinde kóterilgen. Qazir ministrlik oqý baǵdarlamalaryn taldap jatyr.
"12 jyldyq bilim berý mazmunyn biriktirip, "ony 11 synypta aiaqtaýǵa bola ma?" degen máseleni qarastyramyz. Osy maqsatta komissiia qurdyq. Jumys jalǵasyp jatyr", - dedi ministr.
Juldyz Súleimenovanyń aitýynsha, keibir ata-analar balalaryn NZM-dan 10-synyptan keiin alyp ketedi. Alaida mundai oqýshylardy jalpy bilim beretin mektepke aýystyrý kezinde qiyndyq týyndaidy. Sebebi qarapaiym mektepterde negizgi orta bilim 9-synyptan keiin aiaqtalsa, NZM-da bul kezeń 10-synyptan keiin aiaqtalady.
Ministr ázirge naqty sheshim qabyldanbaǵanyn atap ótti. Komissiia oqý baǵdarlamalaryn zerttep, 12 jyldyq bilim berý modelin 11 jylǵa qysqartý múmkindigin anyqtaidy.
