Qazan aiynda Ulttyq statistika biýrosy jariialaǵan málimetke sáikes, 2024 jyl boiyna júrgizilgen zertteý nátijesi boiynsha elimizde jumys isteitin adamdar sanynyń 6,9 paiyzynyń jalaqysy 1 mln teńgege jýyqtasa, al 4,3 paiyzyniki 1 mln teńgeden asady. Demek, elimizde jumyspen qamtylǵandardyń 11,2 paiyzy joǵary jalaqy alady, dep habarlaidy Dalanews.kz.
Qazaqstanda qansha adam jumys isteidi?
Ulttyq statistika biýrosynyń 2024 jylǵy málimetinshe, Qazaqstanda jalpy jumys isteitin halyq sany 9 190 346 adamdy quraidy. Olardyń 52%-y - erler (4 742 544 adam), al 48%-y - áielder (4 447 802 adam). Onyń ishinde óz-ózin jumyspen qamtýshylar sany 2 219 316 adamdy (24%) qamtidy.
"Arnaiy júrgizilgen zertteý qorytyndysy boiynsha 2024 jyly qyzmetkerlerdiń jalaqysynyń medianalyq máni 285 677 teńgeni qurady. Qyzmetkerlerdiń jalaqysynyń modaldy máni (eń kóp taralǵan deńgei) 97 557 teńgeni qurady", - dep naqtylaidy statvedomstvo.
Qazaqstanda jumys isteitin adamdardyń ortasha ailyq jalaqy mólsheri kelesidei:
- jumysshylardyń 6,1%-y 100 000 teńgege deiin jalaqy aldy;
- 100 001-den 150 000 teńgege deiin - 12%;
- 150 001-den 300 000 teńgege deiin - 35,1%;
- 300 001-den 600 000 teńgege deiin - 35,6%;
- 600 001 teńgeden 900 000 teńgege deiin - 6,9%;
- 900 001 teńgeden 1 200 000 teńgege deiin - 2,1%;
- 1 200 001 teńgeden 1 500 000 teńgege deiin – 1%;
- 1 500 001 teńgeden joǵary – qyzmetkerlerdiń 1,2%.
IT mamany, temeki óndirisi, taý-ken salasy
Ulttyq statistika biýrosynyń jylyna bir ret iri, orta jáne shaǵyn kásipkerler arasynda júrgizetin saýalnama qorytyndysyna súiensek, "million" alatyndar IT salasyna shoǵyrlanypty.
"Kompiýterlik baǵdarlamalaý, keńes berý jáne osylarmen bailanysty qosymsha qyzmetter" segmentinde jumys isteitin qyzmetkerlerdiń shamamen 31,5%-y 1 mln teńge jáne odan joǵary mólsherde jalaqy alady.
Odan keiin "iri kompaniialardyń bas keńsesinde jumys isteider", "basqarý máseleleri boiynsha keńes berý" sektorynyń qyzmetkerleri (jalaqysy 1 mln teńgeden bastalatyndardyń úlesi – 24,6%), odan keiin "teńiz jáne jaǵalaýdaǵy júk kóligi qyzmeti" segmenti (22,7%).
20%-y -"jarnamalyq qyzmet jáne naryq koniýnktýrasyn zertteý".
Al hh.kz platforma derekterine sáikes, eń joǵary jalaqy menedjment, marketing jáne avtomobil biznesine tiesili.
Data hub ta Ulttyq statistika biýrosy keltirgen bul málimetteriniń keibirine kúmánmen qaraidy.
"Bizdińshe, bul derekter egjei-tegjeili jiktelmegen. Mysaly, ónerkásip salasynyń óndiris, óńdeý jáne eki kommýnaldyq sektorǵa bólý arqyly shekteledi (elektr/jylytý jáne sýmen jabdyqtaý). Sondyqtan taý-ken (18,4%) nemese óńdeý (tek 4,4%) sektoryndaǵy millionerlerdiń úlesi bul arada eskerilmei qalǵan sekildi. Sol sekildi biz júrgizgen shaǵyn saýalnama keltirilgen tabak salasy men munai segmenti de tysqary qalǵan siiaqty. Aita ketsek, aldynda jariialanǵan málimetterge sáikes, tabak salasyndaǵylar ortasha jalaqy boiynsha 2024 jyldyń II toqsanynda kósh bastap turǵan: 1,3 million teńge (baǵdarlamalaýǵa qaraǵanda joǵary). Bul arada biz temeki ónerkásibindegi basshylarynyń jalaqysy ortashadan joǵary ekenin atap ótken jón. Ortasha deńgei - 3,9 mln teńge. Baǵdarlamalaý segmentinde, aitpaqshy, menedjerler odan az alady: 1,5 mln teńge", delingen Data hub málimetinde.
Áielder barlyq salada erlerge qaraǵanda tómen jalaqy alady
Ulttyq statistika biýrosynyń málimeti boiynsha, 2024 jyldyń ekinshi toqsanynda áielderdiń ortasha ailyq jalaqysy 311 217 teńgeni qurap, erlerge qaraǵanda 35%-ǵa tómen bolǵan. Erlerdiń ortasha jalaqysy 418 788 teńgege jetti.
"Eń úlken alshaqtyq qarjylyq jáne saqtandyrý qyzmetterinde baiqalady, munda áielder erlerge qaraǵanda 50%-ǵa az jalaqy alady. Turǵyn úi jáne tamaqtandyrý qyzmetterinde aiyrmashylyq shamamen 34%-dy quraidy: áielder ortasha eseppen 275 445 teńge, al erler 368 388 teńge alady. Ónerkásip jáne qurylys salalarynda da alshaqtyq aitarlyqtai joǵary – sáikesinshe 40% jáne 24%", - deidi ekonomikalyq sarapshy Qýanysh Beisenǵazin.
