– Máselemen júieli túrde ainalasý maqsatynda qor sport zaldardy jaraqtandyrady dep sheshildi. Osyǵan deiin demeýshilerdiń qoldaýymen aýyldy jerlerde sport zaldardy ashyp júrgen «Batyr bolamyn!» qory bizge júgindi. «24 sport zaly» baǵdarlamasyn bastap, ótken jyly sport infraqurylymy álsiz nemese múlde joq shalǵaidaǵy aýyldar men eldimekenderde 23 zaldy jabdyqtadyq. Ǵimarat jergilikti bilik pen metsenattardyń esebinen berilip jóndelse, Qor jabdyqtarmen jáne sporttyq múkámmalmen qamtamasyz etti, – deidi «Qazaqstan halqyna» qoǵamdyq qorynyń Basqarma tóraǵasy Bolat Jámishev.
Jabydyqtalǵan 23 zalda aýyldardan jáne jaqyn mańdaǵy aýyldardan az qamtylǵan jáne kóp balaly otbasylardan shyqqan 5 jastan 18 jasqa deiingi 1750 bala bokspen, kúrespen, dziýdomen jáne basqa da sport túrlerimen únemi ainalysýǵa múmkindik aldy.
Sport zaldarǵa kúres kilemderi men qaptar, eden jabyndary, jattyǵý manekenderi, sondai-aq gantelder, kiim-keshek, boks qolǵaptary men shlemder, arqandar, sporttyq jinaqtar jáne satyp alyndy. Jergilikti jattyqtyrýshylar shaqyrylyp, balalarǵa úiirme jumysyn ótkizedi. 24 zaldy ashýǵa Qor tarapynan 183,6 mln teńge bólingen.
Máselen, Atyraý oblysynyń 1,5 myńǵa jýyq adam turatyn Bódene aýylynda sport zalynyń ashylýy aýyl azamattary úshin kópten kútken oqiǵa. Mektep oqýshysy Myrzabek Qýanyshbek joldastarymen alǵashqylardyń biri bolyp kúres sektsiiasyna jazyldy.
– Buryn bizdiń aýylda mundai zal men kúresýge arnalǵan sporttyq qural-jabdyqtar bolmady. Osyndai úiirmege barǵysy keletin balalar sany kóp. Sondyqtan múmkindik úshin aǵalarymyzǵa rahmet, – dedi Myrzabek Qýanyshbek.
Bunymen qosa, keibir jasóspirimder jarystarda nátije kórsetip jatyr. Máselen, ótken jyldyń jeltoqsan aiynyń basynda Túrkistan oblysy Qaqpaq aýylynyń turǵyny Dosjan Marat Jaqsylyq Úshkempirovti eske alýǵa arnalǵan grek-rim kúresinen respýblikalyq týrnirde qola júldege ie boldy.
Qor ádettegi sport sektsiialaryna qatysa almaityn erekshe qajettilikteri bar balalarǵa arnalǵan sport zaldaryn jaraqtandyrý jobasyn iske asyrýda. Balalardy beiimdelgish sportqa baýlyp júrgen «Jas jaýynger» dene shynyqtyrý-saýyqtyrý klýbynyń tabysty tájiribesi qoldanyldy. Balalardy ońaltý klýbynyń ádistemesi birneshe jyl boiy joǵary tiimdiligin dáleldep keledi. 2022 jyldyń qazan aiynda Qor qyzmetkerleri «Jas jaýynger» jattyqtyrýshylar quramymen birlesip «Múmkindigi shekteýli balalar men jasóspirimderge arnalǵan beiimdelgen boks, armsport» oqý baǵdarlamasyna avtorlyq quqyqty rastaityn ǵylymi patent aldy. Turaqty qatysýdyń nátijesinde júrý qozǵalysy shektelgen, ári jattyǵýǵa úirenbegen balalar shirap, alǵashqy qadamdaryn jasai bastady. Sondyqtan qor jobany «Tusaýkeser» dep atady. Jobanyń Astanada ashylǵan zalyna qatysyp júrgen balalardyń biri – 10 jastar Ernur. Anasy Baqytgúl Qurmanbekovanyń sózinshe, olar úsh jyl buryn Qyzylordan elordaǵa kóship kelgen sátten bastap Ernur úiirmege qatysyp keledi. Osy ýaqyt ishinde qoly men aiaǵyndaǵy bulshyqetter nyǵaiyp, qimyly senimdi bola tústi.
– Memlekettik qamtamasyz etý aiasynda sal aýrýy bar balalarǵa jylyna bir ret ońaltýǵa kvota beriledi. Bul óte az, óitkeni balalar kún saiyn jattyǵýy tiis. Qyzylordada turǵan kezimizde jylyna Astanaǵa eki ret baratynbyz. Birinshi ret kvota boiynsha tegin em alyp, keiin aqyly bólimge júginetinbiz. Em-dom keshendi júrgizilip, balamdy aiaǵyna turǵyzý úshin alyp, Astanaǵa kóshýdi sheshtik. Sosyn osy úiirmege bara bastadyq. Senbeitin shyǵarsyz, biraq oń qoly ben aiaǵyn álsiz qozǵaltyp kelgen Ernur aqyryndap nátije kórsete bastady. Bulshyqetteri men aiaq-qolyndaǵy kúshi arta tústi. Úiirmege balasyn ákeletin ata-ana kóp. Balasynyń júre bastap, óz-ózine qamqor bola alatynyna úmiti zor. Sondyqtan mundai dene shynyqtyrý-saýyqtyrý klýbtary búkil el boiynsha ashylý kerek, – deidi Ernurdyń anasy Baqytgúl Qurmanbekova.
Qordyń seriktesi «Jas Jaýynger» uiymy qajetti ǵimarat pen jattyqtyrýshylar tobyn anyqtaidy. Qazirgi tańda «Qazaqstan halqyna» qorynyń jobasy Semei, Atyraý, Shymkent, Almaty jáne Astanada ashylyp, oǵan 200-ge tarta erekshe bala barady. 37,4 mln teńge somaǵa zaldar qajetti jabdyqtarmen jáne múkámmalmen jabdyqtalǵan.
– Bul jerde damý erekshelikteri bar balalar jattyǵý jasaýdy, alǵashqy qadamdy jasaýdy úirenedi. Sonymen qatar osynda dos taýyp, ózderin chempion sezinetin oryn. Turaqty qatysyp júrgennen keiin balalardyń emotsionaldy jáne fizikalyq damýyndaǵy oń ózgerister baiqalýda, – dedi «Jas Jaýynger» DSK jetekshisi Sadyq Baiymbetov.
«Qazaqstan halqyna» qory elimizdegi parasporttyń damýyna da úles qosýda. Ótken jyldyń kúzinde Qorǵa Astana qalasynyń para-hokkei federatsiiasy júgindi. Federatsiia negizinde para-hokkeiden Qazaqstannyń birinshi jáne jalǵyz quramasy qurylǵan. Parasportshylardyń tájiribesi bar, Reseide ótken chempionattarda birqatar jetistikterge qol jetkizgen. Alaida, bul jarystarǵa sonaý 2017 jyly satyp alynǵan quraldarymen qatysyp júrdi. Al sporttyq múkámmaldyń qyzmet merzimi nebári 5 jyl. Osylaisha Qor qazaqstandyq quramanyń para-hokkeiden halyqaralyq jarystarǵa daiyndalýy jáne qatysýy úshin sporttyq múkámmal satyp alýdy qarjylandyrdy. Komandaǵa 12,4 million teńge somaǵa 50 syrǵytpa taiaq pen 16 shana satyp alyndy. Jańa syrǵytpa taiaqtarmen Qazaqstan quramasy S pýlyndaǵy Tailandtaǵy chempionatta kúmis júldeger atanyp, joǵary ligaǵa joldama men V tobynyń chempionatynda oinaýǵa múmkindik aldy. Endigi tańda sportshylar kóktemde Slovakiia quramasymen ótetin joldastyq kezdesýge daiyndyq ústinde.
