– ماسەلەمەن جۇيەلى تۇردە اينالاسۋ ماقساتىندا قور سپورت زالداردى جاراقتاندىرادى دەپ شەشىلدى. وسىعان دەيىن دەمەۋشىلەردىڭ قولداۋىمەن اۋىلدى جەرلەردە سپورت زالداردى اشىپ جۇرگەن «باتىر بولامىن!» قورى بىزگە جۇگىندى. «24 سپورت زالى» باعدارلاماسىن باستاپ، وتكەن جىلى سپورت ينفراقۇرىلىمى ءالسىز نەمەسە مۇلدە جوق شالعايداعى اۋىلدار مەن ەلدىمەكەندەردە 23 زالدى جابدىقتادىق. عيمارات جەرگىلىكتى بيلىك پەن مەسەناتتاردىڭ ەسەبىنەن بەرىلىپ جوندەلسە، قور جابدىقتارمەن جانە سپورتتىق مۇكاممالمەن قامتاماسىز ەتتى، – دەيدى «قازاقستان حالقىنا» قوعامدىق قورىنىڭ باسقارما ءتوراعاسى بولات جامىشيەۆ.
جابىدىقتالعان 23 زالدا اۋىلداردان جانە جاقىن ماڭداعى اۋىلداردان از قامتىلعان جانە كوپ بالالى وتباسىلاردان شىققان 5 جاستان 18 جاسقا دەيىنگى 1750 بالا بوكسپەن، كۇرەسپەن، دزيۋدومەن جانە باسقا دا سپورت تۇرلەرىمەن ۇنەمى اينالىسۋعا مۇمكىندىك الدى.
سپورت زالدارعا كۇرەس كىلەمدەرى مەن قاپتار، ەدەن جابىندارى، جاتتىعۋ مانەكەندەرى، سونداي-اق گانتەلدەر، كيىم-كەشەك، بوكس قولعاپتارى مەن شلەمدەر، ارقاندار، سپورتتىق جيناقتار جانە ساتىپ الىندى. جەرگىلىكتى جاتتىقتىرۋشىلار شاقىرىلىپ، بالالارعا ۇيىرمە جۇمىسىن وتكىزەدى. 24 زالدى اشۋعا قور تاراپىنان 183،6 ملن تەڭگە بولىنگەن.
ماسەلەن، اتىراۋ وبلىسىنىڭ 1،5 مىڭعا جۋىق ادام تۇراتىن بودەنە اۋىلىندا سپورت زالىنىڭ اشىلۋى اۋىل ازاماتتارى ءۇشىن كوپتەن كۇتكەن وقيعا. مەكتەپ وقۋشىسى مىرزابەك قۋانىشبەك جولداستارىمەن العاشقىلاردىڭ ءبىرى بولىپ كۇرەس سەكسياسىنا جازىلدى.
– بۇرىن ءبىزدىڭ اۋىلدا مۇنداي زال مەن كۇرەسۋگە ارنالعان سپورتتىق قۇرال-جابدىقتار بولمادى. وسىنداي ۇيىرمەگە بارعىسى كەلەتىن بالالار سانى كوپ. سوندىقتان مۇمكىندىك ءۇشىن اعالارىمىزعا راحمەت، – دەدى مىرزابەك قۋانىشبەك.
بۇنىمەن قوسا، كەيبىر جاسوسپىرىمدەر جارىستاردا ناتيجە كورسەتىپ جاتىر. ماسەلەن، وتكەن جىلدىڭ جەلتوقسان ايىنىڭ باسىندا تۇركىستان وبلىسى قاقپاق اۋىلىنىڭ تۇرعىنى دوسجان مارات جاقسىلىق ۇشكەمپىروۆتى ەسكە الۋعا ارنالعان گرەك-ريم كۇرەسىنەن رەسپۋبليكالىق تۋرنيردە قولا جۇلدەگە يە بولدى.
قور ادەتتەگى سپورت سەكسيالارىنا قاتىسا المايتىن ەرەكشە قاجەتتىلىكتەرى بار بالالارعا ارنالعان سپورت زالدارىن جاراقتاندىرۋ جوباسىن ىسكە اسىرۋدا. بالالاردى بەيىمدەلگىش سپورتقا باۋلىپ جۇرگەن «جاس جاۋىنگەر» دەنە شىنىقتىرۋ-ساۋىقتىرۋ كلۋبىنىڭ تابىستى تاجىريبەسى قولدانىلدى. بالالاردى وڭالتۋ كلۋبىنىڭ ادىستەمەسى بىرنەشە جىل بويى جوعارى تيىمدىلىگىن دالەلدەپ كەلەدى. 2022 جىلدىڭ قازان ايىندا قور قىزمەتكەرلەرى «جاس جاۋىنگەر» جاتتىقتىرۋشىلار قۇرامىمەن بىرلەسىپ «مۇمكىندىگى شەكتەۋلى بالالار مەن جاسوسپىرىمدەرگە ارنالعان بەيىمدەلگەن بوكس، ارمسپورت» وقۋ باعدارلاماسىنا اۆتورلىق قۇقىقتى راستايتىن عىلىمي پاتەنت الدى. تۇراقتى قاتىسۋدىڭ ناتيجەسىندە ءجۇرۋ قوزعالىسى شەكتەلگەن، ءارى جاتتىعۋعا ۇيرەنبەگەن بالالار شيراپ، العاشقى قادامدارىن جاساي باستادى. سوندىقتان قور جوبانى «تۇساۋكەسەر» دەپ اتادى. جوبانىڭ استانادا اشىلعان زالىنا قاتىسىپ جۇرگەن بالالاردىڭ ءبىرى – 10 جاستار ەرنۇر. اناسى باقىتگۇل قۇرمانبەكوۆانىڭ سوزىنشە، ولار ءۇش جىل بۇرىن قىزىلوردان ەلورداعا كوشىپ كەلگەن ساتتەن باستاپ ەرنۇر ۇيىرمەگە قاتىسىپ كەلەدى. وسى ۋاقىت ىشىندە قولى مەن اياعىنداعى بۇلشىقەتتەر نىعايىپ، قيمىلى سەنىمدى بولا ءتۇستى.
– مەملەكەتتىك قامتاماسىز ەتۋ اياسىندا سال اۋرۋى بار بالالارعا جىلىنا ءبىر رەت وڭالتۋعا كۆوتا بەرىلەدى. بۇل وتە از، ويتكەنى بالالار كۇن سايىن جاتتىعۋى ءتيىس. قىزىلوردادا تۇرعان كەزىمىزدە جىلىنا استاناعا ەكى رەت باراتىنبىز. ءبىرىنشى رەت كۆوتا بويىنشا تەگىن ەم الىپ، كەيىن اقىلى بولىمگە جۇگىنەتىنبىز. ەم-دوم كەشەندى جۇرگىزىلىپ، بالامدى اياعىنا تۇرعىزۋ ءۇشىن الىپ، استاناعا كوشۋدى شەشتىك. سوسىن وسى ۇيىرمەگە بارا باستادىق. سەنبەيتىن شىعارسىز، ءبىراق وڭ قولى بەن اياعىن ءالسىز قوزعالتىپ كەلگەن ەرنۇر اقىرىنداپ ناتيجە كورسەتە باستادى. بۇلشىقەتتەرى مەن اياق-قولىنداعى كۇشى ارتا ءتۇستى. ۇيىرمەگە بالاسىن اكەلەتىن اتا-انا كوپ. بالاسىنىڭ جۇرە باستاپ، وز-وزىنە قامقور بولا الاتىنىنا ءۇمىتى زور. سوندىقتان مۇنداي دەنە شىنىقتىرۋ-ساۋىقتىرۋ كلۋبتارى بۇكىل ەل بويىنشا اشىلۋ كەرەك، – دەيدى ەرنۇردىڭ اناسى باقىتگۇل قۇرمانبەكوۆا.
قوردىڭ سەرىكتەسى «جاس جاۋىنگەر» ۇيىمى قاجەتتى عيمارات پەن جاتتىقتىرۋشىلار توبىن انىقتايدى. قازىرگى تاڭدا «قازاقستان حالقىنا» قورىنىڭ جوباسى سەمەي، اتىراۋ، شىمكەنت، الماتى جانە استانادا اشىلىپ، وعان 200-گە تارتا ەرەكشە بالا بارادى. 37،4 ملن تەڭگە سوماعا زالدار قاجەتتى جابدىقتارمەن جانە مۇكاممالمەن جابدىقتالعان.
– بۇل جەردە دامۋ ەرەكشەلىكتەرى بار بالالار جاتتىعۋ جاساۋدى، العاشقى قادامدى جاساۋدى ۇيرەنەدى. سونىمەن قاتار وسىندا دوس تاۋىپ، وزدەرىن چەمپيون سەزىنەتىن ورىن. تۇراقتى قاتىسىپ جۇرگەننەن كەيىن بالالاردىڭ ەموسيونالدى جانە فيزيكالىق دامۋىنداعى وڭ وزگەرىستەر بايقالۋدا، – دەدى «جاس جاۋىنگەر» دسك جەتەكشىسى سادىق بايىمبەتوۆ.
«قازاقستان حالقىنا» قورى ەلىمىزدەگى پاراسپورتتىڭ دامۋىنا دا ۇلەس قوسۋدا. وتكەن جىلدىڭ كۇزىندە قورعا استانا قالاسىنىڭ پارا-حوككەي فەدەراسياسى جۇگىندى. فەدەراسيا نەگىزىندە پارا-حوككەيدەن قازاقستاننىڭ ءبىرىنشى جانە جالعىز قۇراماسى قۇرىلعان. پاراسپورتشىلاردىڭ تاجىريبەسى بار، رەسەيدە وتكەن چەمپيوناتتاردا ءبىرقاتار جەتىستىكتەرگە قول جەتكىزگەن. الايدا، بۇل جارىستارعا سوناۋ 2017 جىلى ساتىپ الىنعان قۇرالدارىمەن قاتىسىپ ءجۇردى. ال سپورتتىق مۇكاممالدىڭ قىزمەت مەرزىمى نەبارى 5 جىل. وسىلايشا قور قازاقستاندىق قۇرامانىڭ پارا-حوككەيدەن حالىقارالىق جارىستارعا دايىندالۋى جانە قاتىسۋى ءۇشىن سپورتتىق مۇكاممال ساتىپ الۋدى قارجىلاندىردى. كومانداعا 12،4 ميلليون تەڭگە سوماعا 50 سىرعىتپا تاياق پەن 16 شانا ساتىپ الىندى. جاڭا سىرعىتپا تاياقتارمەن قازاقستان قۇراماسى س پۋلىنداعى تايلاندتاعى چەمپيوناتتا كۇمىس جۇلدەگەر اتانىپ، جوعارى ليگاعا جولداما مەن ۆ توبىنىڭ چەمپيوناتىندا ويناۋعا مۇمكىندىك الدى. ەندىگى تاڭدا سپورتشىلار كوكتەمدە سلوۆاكيا قۇراماسىمەن وتەتىن جولداستىق كەزدەسۋگە دايىندىق ۇستىندە.
قور ەلىمىزدىڭ پاراسپورتشىلارىنا ارنالعان سپورتتىق-جۇگىرۋ پروتەزدەرىن جاساۋ بويىنشا قايىرىمدىلىق باعدارلاماسىن جۇزەگە اسىرۋدى باستادى. ءدال وسى پاراليمپيادالىق سپورت تۇرىندە قازاقستان ۇسىنىلماعان، وعان سپورتتىق پروتەزدەردىڭ قىمباتتىعى دا سەبەپ. ۇلتتىق پاراليمپيادا كوميتەتىنىڭ مالىمەتى بويىنشا، ەلدە 70-كە جۋىق اياق-قول امپۋتاسياسى بار سپورتشى بار جانە تەك ءبىر عانا سپورتشىنىڭ جۇگىرۋگە قاتىسۋى ءۇشىن سپورتتىق پروتەزى بار. قور جالپى سوماسى 113،4 ملن تەڭگەگە 10 پروتەز ازىرلەۋدى جوسپارلانۋدا. ءاربىر پروتەزدىك-ورتوپەديالىق بۇيىم جەكە بولعانىمەن، سپورتشى اۋىستىرىلعان جاعدايدا سالىستىرمالى فيزيكالىق پارامەترلەرى ۇقساس كەز كەلگەن پاراسپورتشى ونى پايدالانا الادى. قازىرگى ۋاقىتتا «فارماس» ج ش س ءوندىرۋشى كومپانياسى پروتەزدەردى دايىنداۋ ءۇشىن قاجەتتى ولشەمدەر الىنۋدا.
