Qazaqstandaǵy volonterlik qozǵalys sońǵy jyldary jekelegen bastamalar men aktsiialar sheńberinen shyǵyp, júieli ári uzaq merzimdi baǵytqa ainalyp keledi. Memlekettik qoldaý tetikteriniń qalyptasýy, volonterler úshin qajetti infraqurylymnyń damýy jáne olardyń eńbegin yntalandyrý qozǵalystyń turaqty damýyna jańa múmkindikter ashty.
Bul baǵyt halyqaralyq deńgeide de jalǵasyn taýyp otyr. Astanada ótken TMD volonterleriniń alǵashqy forýmy volonterlik qozǵalysty damytý, tájiribe almasý jáne birlesken jobalardy iske asyrý úshin mańyzdy alań qalyptastyrdy. Forým aiasynda Memleket basshysy Qasym-Jomart Toqaev BUU Volonterler baǵdarlamasynyń atqarýshy úilestirýshisi Toili Kýrbanovty qabyldap, volonterlik qozǵalysty odan ári damytý jáne Halyqaralyq volonterler jylyn iske asyrý máselelerin talqylady.
Qazaqstannyń volonterlik qozǵalysty damytýdaǵy tájiribesin joǵary baǵalaityndardyń biri – Belarýs Respýblikasynyń Respýblikalyq volonterlik ortalyǵynyń basshysy Egor Podoliak. Onyń pikirinshe, Qazaqstannyń volonterlikti institýtsionaldyq deńgeide qoldaýǵa baǵyttalǵan saiasaty qozǵalystyń turaqty damýyna berik negiz qalyptastyrǵan.
- Prezident Qasym-Jomart Toqaev 2020 jylǵy Volonterler jylynan beri volonterlik qozǵalysty júieli túrde qoldap keledi. Búginde bul baǵyt halyqaralyq deńgeide de jalǵasyn taýyp otyr. Osy jolǵa ishki úderister turǵysynan kóz júgirtsek, Memleket basshysynyń volonterlikti damytýǵa qatysty qandai sheshimderin eń mańyzdy dep baǵalar edińiz?
- Belarýs Respýblikasynyń Respýblikalyq volonterlik ortalyǵynyń basshysy retinde TMD-daǵy áriptesterimizdiń volonterlik sektordy damytý baǵytyndaǵy jumystaryn muqiiat baqylap kelemin. Prezident Qasym-Jomart Toqaevtyń 2020 jyldy Volonterler jyly dep jariialaý týraly bastamasy jai ǵana kúntizbelik mańyzdy oqiǵa emes, tereń ári júieli reformalarǵa serpin bergen qýatty katalizator boldy. Memleket basshysynyń eń mańyzdy sheshimi retinde volonterlikti institýtsionaldandyrý baǵytyn atap óter edim. Qazaqstan Prezidenti eriktilikti stihiialyq qaiyrymdylyq aktsiialary deńgeiinen uzaq merzimdi memlekettik strategiia deńgeiine kóterdi. Biryńǵai tsifrlyq platformany qurý jáne qoldaý, volonterlik bastamalardy memlekettik granttyq qarjylandyrý tetikterin engizý, sondai-aq volonterlik tájiribeni tolyqqandy eńbek ótili retinde zańnamalyq turǵydan moiyndaý – qozǵalysty damytýdyń berik negizin qalaǵan irgeli sheshimder. Bul – memlekettiń saiasi erik-jigeri azamattardyń ózin-ózi júzege asyrýyna naqty múmkindikter qalyptastyra alatynynyń jarqyn mysaly.
- Búginde elimizdegi volonterler sany 300 myńǵa jýyqtady, al Halyqaralyq volonterler jyly aiasynda myńnan astam is-shara ótkizilip jatyr. Bul kórsetkishter Qazaqstannyń volonterlik qozǵalysty qoldaý jónindegi memlekettik saiasatynyń tiimdiligin qanshalyqty kórsetedi?
- Sandardyń ózi kóp nárseni ańǵartady. Qazaqstandaǵy volonterler sanynyń 300 myńǵa jýyqtaýy jáne myńdaǵan aýqymdy is-sharanyń ótkizilýi – jastardyń memleket júrgizip otyrǵan saiasatqa degen seniminiń tikelei ári eń obektivti kórsetkishi. Mundai nátijege memlekettik apparat pen azamattyq qoǵam arasyndaǵy ózara is-qimylsyz qol jetkizý múmkin emes. Qazaqstan Respýblikasynyń Mádeniet jáne aqparat ministrligi Ulttyq volonterlik jelimen birlesip, jas urpaqqa túsinikti ári qoljetimdi qoldaý ekojúiesin qalyptastyra aldy. Belarýstegi bizge de mundai tásil óte jaqyn, óitkeni biz óz júiemizdi memlekettik bilim berý uiymdary men Respýblikalyq volonterlik ortalyqtyń bazasynda qalyptastyryp jatyrmyz. Qazaqstannyń tájiribesi kórsetkendei, memleket volonterge jai ǵana deklaratsiia emes, naqty infraqurylym, ádistemelik qoldaý jáne onyń eńbegine degen qurmet usynǵan kezde, qoǵam oǵan aýqymdy ári jasampaz belsendilikpen jaýap beredi.
- Prezidenttiń bastamasymen volonterlik qyzmetti yntalandyrý alǵash ret konstitýtsiialyq deńgeide bekitildi. Bul sheshim volonterlikti odan ári damytýǵa jáne onyń qoǵamdaǵy rólin arttyrýǵa qandai mán beredi?
- Volonterlik qyzmetti memlekettik qoldaý jáne yntalandyrý týraly normanyń Qazaqstan Respýblikasynyń Konstitýtsiiasyna engizilýi – tek TMD keńistigi úshin ǵana emes, jahandyq aýqymda da tarihi ári buryn-sońdy bolmaǵan sheshim. Bul sheshim volonterlikti eń joǵary qundylyqtar deńgeiine kóteredi. Endi Qazaqstandaǵy eriktilik jai ǵana áleýmettik hobbi nemese qoǵamdyq belsendilik emes, konstitýtsiialyq turǵydan qorǵalǵan memlekettik qundylyq ári ulttyq biregeiliktiń mańyzdy elementi. Volonterlerdiń ózderi úshin bul – olardyń qoǵamǵa qosqan úlesiniń memleket deńgeiinde moiyndalǵanyn bildiretin asa mańyzdy belgi. Bul qadam syrtqy jaǵdailarǵa qaramastan, volonterlik qozǵalysty qoldaýdyń sabaqtastyǵyna kepildik berip, azamattardyń óz eliniń damýyna úles qosyp jatqanyna degen tereń jaýapkershilik sezimin qalyptastyrady.
- Búgingi TMD volonterler forýmy Qazaqstannyń bastamasymen ótip, halyqaralyq yntymaqtastyq úshin jańa alań qalyptastyryp otyr. Prezident Qasym-Jomart Toqaevtyń osy baǵyttaǵy júieli saiasaty Qazaqstannyń óńirdegi volonterlik bastamalardy damytý ortalyqtarynyń birine ainalýyna yqpal ete ala ma?
- Prezident Qasym-Jomart Toqaevtyń volonterlik baǵyttaǵy júieli saiasaty jáne Astanada TMD volonterleriniń birinshi forýmynyń ótkizilýi Qazaqstandy óńirimizdegi volonterliktiń negizgi ortalyqtarynyń birine ainaldyryp otyrǵanyna kámil senimdimin. Bul forýmdy ótkizýdi bastamalaǵan Qazaqstan kóshbasshylyq ári integratsiialyq missiiany óz moinyna aldy. Bizge biryńǵai standarttar ázirleý, ádistemelermen almasý jáne ekologiia, tarihi murany saqtaý, inkliýziia, kiberqaýipsizdik baǵyttarynda transshekaralyq jobalardy iske qosý úshin turaqty halyqaralyq alań qajet. Belarýs Respýblikasynyń Respýblikalyq volonterlik ortalyǵy TMD-nyń jastar volonterlik qozǵalysyn ǵylymi-ádistemelik qamtamasyz etý jónindegi bazalyq uiymy retinde Qazaqstannyń osy saladaǵy kóshbasshylyǵyn shyn júrekten qoldaidy. Biz Forýmdy Dostastyqtyń búkil keńistigindegi jastar integratsiiasynyń turaqty qozǵaýshy kúshine ainaldyrý úshin qazaqstandyq áriptesterimizben tyǵyz strategiialyq seriktestik ornatýǵa daiynbyz.
