Qazaqstan Semei, Óskemen jáne Kókshetaý qalalarynda jylý elektr ortalyqtaryn (JEO) Reseidiń qatysýynsyz salatyn boldy, dep habarlaidy Dala News.
Bul týraly Úkimettegi brifingte energetika vitse-ministri Suńǵat Esimhanov málimdedi.
«Úsh JEO boiynsha EPC-kelisimsharttar jasaldy, ol jerde reseilik merdigerler joq. Qurylysty qazaqstandyq merdigerler júrgizedi», – dedi Esimhanov. 
Onyń aitýynsha, jobalardy qazaqstandyq-singapýrlyq konsortsiým iske asyrady. Qazirgi tańda Semei men Óskemendegi JEO boiynsha kelisimsharttar 2026 jyldyń basynda jasalyp qoiǵan. 
Vitse-ministrdiń málimetinshe, jobalar «kilt tapsyrý» qaǵidaty boiynsha júzege asady, iaǵni merdiger jobalaý, jabdyq jetkizý jáne qurylys jumystaryn tolyq óz moinyna alady. 
Sonymen qatar, stantsiialarda zamanaýi tehnologiialar, sonyń ishinde «taza kómir» jáne tsifrlyq sheshimder qoldaný josparlanǵan. 
Jobalardyń quny da belgili boldy. Kókshetaýdaǵy JEO shamamen 350 mlrd teńgege baǵalansa, Semei men Óskemendegi stantsiialar árqaisysy shamamen 400 mlrd teńgeden asady. 
«Jobalar biýdjet esebinen qarjylandyrylmaidy. Kompaniialar ózderi qarajat tartyp, stantsiialardy salady, keiin tarif arqyly shyǵyndaryn qaitarady», – dep túsindirdi Esimhanov. 
Qurylys jumystary jaqyn ailarda belsendi kezeńge ótedi. Negizgi jabdyqtardy jetkizý 2027 jyldan bastalyp, barlyq stantsiialardy 2029 jyly iske qosý josparlanyp otyr. 
Aita keteiik, bastapqyda bul jobalardy Reseimen birlesip júzege asyrý josparlanǵan bolatyn. Alaida qarjylandyrý máseleleri men kelissózderdiń sozylýyna bailanysty Qazaqstan jobalardy óz betinshe iske asyrý týraly sheshim qabyldady.
