Qazaqstan Reseige qatysty óte saýatty, parasatty ári kóregen saiasat júrgizip otyr. Eldiń ekonomikalyq jáne áskeri salada Batys elderimen qarym-qatynasty nyǵaitýy – sonyń aiqyn dáleli. Mundai pikirdi Ýkrainanyń Syrtqy barlaý qyzmetiniń burynǵy basshysy, armiia generaly Nikolai Malomýj aitty, dep habarlaidy Dalanews.kz.
Ýkrainalyq generaldyń aitýynsha, Qazaqstan uzaq ýaqyttan beri óz áskerin kezeń-kezeńimen batystyq standarttarǵa kóshirip keledi. Buǵan deiin Resei qarý-jaraq pen oq-dári óndirisi salasynda Qazaqstan naryǵynda monopoliiaǵa ie bolǵan edi. Alaida Qazaqstan bul monopoliiany joiyp, britan-kanadalyq kompaniiamen birlesip, barlyq kalibrli oq-dári shyǵaratyn zaýyt ashty. Sonymen qatar jýyrda Qazaqstan men Ulybritaniia arasynda 2025–2026 jyldarǵa arnalǵan áskeri yntymaqtastyq jospary bekitildi. Ýkrainalyq sarapshy osy kelisimdi Qazaqstannyń qorǵanys salasyndaǵy qaýipsizdigin kúsheitý jolyndaǵy mańyzdy ári durys qadamy dep baǵalap otyr.
– Resei Qazaqstan men Ulybritaniia arasyndaǵy kelisimdi qabyldaidy. Sebebi Qazaqstanmen qaqtyǵysqa barý – Resei úshin arqadan soqqy alýmen teń bolmaq. Mundai qadamǵa Máskeýdiń qaýqary da, nieti de joq. Qazaqstan dál osy jolmen – halyqaralyq seriktestik arqyly, ekonomikalyq, saiasi jáne áskeri qaýipsizdik salasyndaǵy yntymaqtastyq arqyly – soǵystyń aldyn alyp otyr. Eger Resei osyndai saiasat ustanǵan bolsa, ýkrain jerinde soǵys ashpas edi, – dedi general Malomýj «24 kanalǵa» bergen suhbatynda.
Ýkrainalyq generaldyń pikirinshe, Qazaqstan óziniń ulttyq múddesin qorǵaýda mádeni salada da batyl áreket etip keledi. Sonyń biri – qazaq álipbiin latyn grafikasyna kóshirý týraly sheshimi. Muny general Qazaqstannyń syrtqy qysymǵa táýelsiz, egemen saiasat ustanýynyń jarqyn mysaly retinde atap ótti.
Aita keteiik, 6 maýsymda Qazaqstan men Ulybritaniianyń qorǵanys vedomstvolary arasynda áskeri yntymaqtastyq josparyna qol qoiylǵany habarlandy. Qujatta kórsetilgen basty baǵyttar – bitimgerlik qyzmet, tildik daiyndyq jáne qazaqstandyq áskeri qyzmetshilerdi Ulybritaniianyń joǵary áskeri oqý oryndarynda oqytý.
Eske salaiyq, kúni keshe Prezident – Joǵarǵy Bas qolbasshy Qasym-Jomart Toqaev Qorǵanys ministrliginiń basshylyq quramymen arnaiy keńes ótkizip, áskerdiń jaýyngerlik qabiletin arttyrýǵa qatysty birqatar mańyzdy tapsyrma bergen bolatyn.
Kezdesý barysynda Memleket basshysy Qarýly Kúshterdiń joǵary qolbasshylyǵyna basymdyq beretin negizgi mindetterdi atap ótti. Qasym-Jomart Toqaev qorǵanys salasyn tsifrlandyrýǵa jáne zamanaýi áskeri tehnologiialarǵa, onyń ishinde jasandy intellekt múmkindikterin paidalanýǵa shaqyrdy.
Sonymen qatar, elimizdiń qorǵanys qabiletin nyǵaitýǵa yqpal etetin halyqaralyq yntymaqtastyq pen strategiialyq seriktestikterdi de taldaýǵa tyrysyp kórdik. Jahandyq qaýipsizdiktiń ózektiligi artyp otyrǵan qazirgi álemde Qarýly Kúshterdiń róli árbir memlekettiń ulttyq qorǵanys qabiletiniń ajyramas quramdas bóligine ainalyp barady. Sondyqtan da dál búgingi tańda Qazaqstan Respýblikasy Qarýly Kúshteriniń qorǵanys qabiletin qamtamasyz etýdegi róli men mindetterin, sondai-aq áskeri doktrinasy qurylǵan negizgi qaǵidattardy bir zerdelep alýdyń mańyzy zor.
