Memleket basshysy ishki ister ministri Erjan Sádenovti qabyldady, dep habarlaidy dalanews.kz.
Prezident Qasym-Jomart Toqaevqa eldegi kriminogendik ahýal jáne ishki ister organdarynyń aldyna qoiylǵan mindetterdiń oryndalýy jóninde baiandaldy.
Memleket basshysyna 2026 jyldyń alǵashqy bes aiynyń qorytyndysy boiynsha tirkelgen qylmys sany byltyrǵy kezeńmen salystyrǵanda 9 paiyzǵa tómendegeni aityldy. Negizgi sanattar boiynsha quqyqbuzýshylyqtyń azaiýy jáne qylmysty ashý deńgeiiniń artýy baiqalady.
Aldyn alý is-sharalary men qoǵamdyq qaýipsizdikti saqtaý máselesine erekshe nazar aýdarylyp otyr.
Vedomstvo jazanyń bultartpas qaǵidatyn dáiekti túrde qamtamasyz etip keledi. Esepti kezeńde ótken jyldary jasalǵan 1685 qylmys ashylǵan. Sot tóreliginen jasyrynyp júrgen 574 qylmysker, onyń ishinde 89-y shetelden tabyldy.
Ministr Memleket basshysyna kiberqylmysqa, esirtki qylmysyna, uiymdasqan qylmysqa jáne ekstremizmge qarsy kúres nátijeleri jóninde aqparat berdi. Qylmystyq toptardyń jolyn kesý, azamattardy qaýip-qaterlerden qorǵaý, sondai-aq qaýipsizdik salasyndaǵy halyqaralyq yntymaqtastyqty nyǵaitý boiynsha keshendi is-sharalar qolǵa alynǵan.
Kezdesý sońynda Memleket basshysy eldegi qoǵamdyq qaýipsizdik pen quqyqtyq júieni qamtamasyz etý úshin «Zań men tártip» qaǵidatyn naqty júzege asyrý jóninde birqatar tapsyrma júktedi.
