Búginde qazaqstandyq kásipkerler úshin Reseı baǵytynda jumys istep, barlyq operasıalyq máselelerdi sheshý úshin ınstıtýsıonaldyq jaǵdaılar jasalǵan. Sondyqtan budan ary qaraı Qazaqstannyń Reseıdegi saýda ókildigin ustaýdyń qajeti joq. Aldaǵy ýaqytta ókildikte jumys istegen mamandar Qazaqstannyń basqa elderde dıplomatıalyq baılanysyn kúsheıtýge baǵyttalatyn bolady.
Bul sheshim 1992 jylǵy 22 qazandaǵy saýda ókildikterin ózara qurý týraly úkimetaralyq kelisimniń kúshin joıýdy talap etpeıdi jáne Reseı Federasıasynyń QR-daǵy saýda ókildiginiń jumysyna jáne jalpy ekijaqty saýda-ekonomıkalyq yntymaqtastyqtyń damýyna áser etpeıdi.
Reseı Qazaqstannyń negizgi saýda-ekonomıkalyq seriktesi bolyp tabylady. Bul birqatar obektıvti faktorlarǵa baılanysty: geografıalyq ornalasýy, EAEO-nyń jalpy ekonomıkalyq keńistigi, damyǵan sharttyq-quqyqtyq bazasy, ekijaqty yntymaqtastyqty ilgeriletý úshin tıimdi alańdardyń bolýy (úkimetaralyq komısıa, óńiraralyq yntymaqtastyq forýmy, saýda-ekonomıkalyq yntymaqtastyqtyń negizgi baǵyttary boıynsha kishi komısıalar).
Búgingi tańda Qazaqstanda Reseıdiń qatysýymen 8000-ǵa jýyq kompanıa jáne 3348 birlesken kásiporyn jumys isteıdi.
Máskeýdegi HSHJK aýmaǵynda halyqaralyq mańyzy bar "Qazaqstan" saýda-kórme ortalyǵy ("QazExpoCongress" UK» AQ jalǵyz qatysýshysy) jumys isteıdi. Onyń mindetterine mádenı-gýmanıtarlyq jáne saýda-ekonomıkalyq yntymaqtastyqty ilgeriletý kiredi.
Reseı Federasıasynda ekonomıkalyq dıplomatıany ilgeriletý fýnksıasyn eskerip, Qazaqstannyń Reseıdegi elshiliginen basqa, Sankt-Peterbýrg, Omby, Qazan jáne Astrahan qalalaryndaǵy bas konsýldyqtar tıimdi jumys isteıdi.
Sonymen qatar, Ekaterınbýrg qalasynda Qazaqstannyń Bas konsýldyǵyn ashý máselesi talqylanýda.
Qazaqstannyń Reseıdegi saýda-ekonomıkalyq yntymaqtastyǵy boıynsha odan ári jumys Reseıdiń barlyq iri qalalary men aımaqtarynda qurylǵan "QazTrade" SSDO AQ seriktestik jelisi arqyly jalǵastyrylatyn bolady.
