Qazaqstan men Qytai BUU Bas Assambleiasynda Reseidiń Ýkrainaǵa basqynshylyǵyn synaityn tusy bar qarardy jaqtap daýys berdi. Buǵan deiin Qazaqstan men Qytai mundai rezoliýtsiialarǵa daýys bergende qalys qalyp kelgen edi.
Daýys berý 26 sáýirde ótken. "BUU men Eýropa keńesiniń seriktestigi" rezoliýtsiiasyn 122 el qoldaǵan. Olardyń qatarynda Reseidiń seriktesi sanalatyn Armeniia, Braziliia jáne Úndistan da bar.
Rezoliýtsiiada "Reseidiń Ýkrainaǵa basqynshylyq jasaǵany", "buǵan deiin Grýziiaǵa agressiia kórsetkeni", "Reseidiń qurbandarǵa shyǵyndy óteý mindeti" jaily aitylady.
"Eýropa aldynda turǵan eń úlken másele BUU men Eýropa keńesiniń qarym-qatynasyn nyǵaitýdy talap etedi. Bul elderdiń táýelsizdigi men aýmaqtyq tutastyǵyn qurmettei otyra beibitshilik ornatý úshin, adam quqyǵyn saqtaý úshin, soǵys kezinde halyqaralyq gýmanitarlyq quqyqtardy saqtaý úshin, halyqaralyq quqyqty buzǵandardy jaýapqa tartyp, qurbandarǵa shyǵyndy óteý úshin mańyzdy" dep jazylǵan rezoliýtsiianyń 9-paragrafynda.
Qujatqa Resei, Belarýs, Soltústik Koreia, Nikaragýa, Siriia qarsy daýys berdi. Qyrǵyzstan, Tájikstan jáne Ózbekstan qalys qalǵan elderdiń qatarynda. Reseidiń BUU-daǵy ókili qarardy "aiyptaýy basym saiasilandyrylǵan qujat" dep synady.
Eýropa keńesi – Eýropa odaǵynyń qurylymyna kirmeitin halyqaralyq uiym. Maqsaty – quramyna enetin 46 eldiń arasynda adam quqyǵyn qorǵaý, demokratiia, zań ústemdigi jáne mádeni bailanysty nyǵaitý.
Resmi Astana Reseidiń Ýkrainaǵa basqynshylyǵyna bailanysty beitarap pozitsiiany ustanyp otyr. Qazaqstan biligi Reseidiń Ýkrainaǵa soǵys ashýyn ashyq synaǵan joq, biraq Ýkrainanyń aýmaqtyq tutastyǵyn qurmetteitinin málimdegen.
Qazaqstan osyǵan deiin Reseidiń Ýkrainaǵa ashqan soǵysyn synaityn qararlardyń kóbinde qalys qalyp kelgen. Al Reseiden Ýkraina aýmaǵynan áskerin alyp shyǵyp, agressiiany toqtatýdy talap etken qararǵa qarsy daýys bergen.
https://dalanews.kz/saraptama/88837-bashinskaia-deputattyq-okilettigin-oz
