Qazaqstannyń Ádilet ministrligi Qashaǵan ken ornyn igerýshi North Caspian Operating Company (NCOC) konsortsiýmynyń halyqaralyq arbitraj arqyly kóp milliardtyq ekologiialyq aiyppuldy óndirip alýdy toqtatý áreketine qatysty málimdeme jasady, dep habarlaidy dalanews.kz.
Vedomstvonyń habarlaýynsha, IýNSITRAL kommertsiialyq arbitrajynyń aralyq sheshimi Qazaqstan aýmaǵynda avtomatty túrde zańdy kúshine enbeidi jáne qazaqstandyq sottardyń zańdy kúshine engen sheshimderiniń kúshin joia almaidy.
Ministrlik Qashaǵan operatoryna kúkirtti belgilengen normadan artyq kólemde saqtaǵany úshin salynǵan aiyppuldy erikti túrde óteý merzimi 20 shildede aiaqtalatynyn eske saldy. Eger osy ýaqytqa deiin qarajat biýdjetke túspese, memleket aiyppuldy májbúrlep óndirip alý rásimin bastap, negizgi somaǵa qosa 10 paiyz kóleminde qosymsha sanktsiia qoldanady.
Sonymen qatar Ádilet ministrligi IýNSITRAL tribýnaly investitsiialyq arbitraj bolyp sanalmaitynyn atap ótti.
Ministrliktiń túsindirýinshe, bul arbitrajdyń ókilettigi tek kommertsiialyq-quqyqtyq daýlardy qaraýmen shekteledi jáne memlekettiń egemen quqyqtary men memlekettik ókilettikterine qatysty sheshim qabyldaýǵa quzyreti joq.
Sondai-aq sheteldik qamtamasyz etý sharalary Qazaqstanda mindetti túrde otandyq sottardyń taný rásiminen ótýi qajet. Alaida bul jaǵdaida mundai rásim júrgizilmegen.
Osyǵan bailanysty ministrlik memlekettik organdar kommertsiialyq arbitrajdyń aralyq sheshimderin oryndaý úshin qoldanystaǵy zańnamany ainalyp ótpeitinin jáne qorshaǵan ortany qorǵaý máselesinde ulttyq múddeni basshylyqqa alatynyn málimdedi.
Budan bólek, vedomstvo NCOC-tiń arbitraj protsesiniń egjei-tegjeiin buqaralyq aqparat quraldary arqyly jariialaǵanyn synǵa aldy. Ministrliktiń pikirinshe, mundai áreket halyqaralyq arbitrajdyń qupiialyq qaǵidatyna qaishy keledi jáne istiń obektivti qaralýyna keri áser etýi múmkin.
