Qazaqstan Joǵarǵy soty qaraqalpaq belsendisi Aqylbek Muratbaiǵa (Muratovqa) bosqyn mártebesin berýden bas tartý týraly tómengi sottardyń sheshimin kúshinde qaldyrdy, dep habarlaidy Dalanews.kz.
Bul týraly belsendi áleýmettik jelidegi X paraqshasynda habarlady.
"Astanadaǵy sot burynǵy instantsiialardyń sheshimin kútpegendei emes, kúshinde qaldyrdy — maǵan Qazaqstanda bosqyn mártebesi túpkilikti túrde berilmedi. Ókinishke qarai, ázirge basqa derekterdi aita almaimyn. Sot otyrysyna kelip qoldaý kórsetken ári áli kúnge deiin kómektesip júrgen barlyq jandarǵa alǵys bildiremin", – dep jazdy ol.
2022 jyldyń jazynda Qaraqalpaqstan astanasy Núkiste ótken narazylyq aktsiialary qantógiske ulasqannan keiin, Ózbekstan biligi Muratovty «konstitýtsiialyq qurylysty buzýǵa árekettendi» jáne «tártipsizdikke shaqyrdy» dep aiyptap, onyń ekstraditsiiasyn talap etken bolatyn.
