Qazaqstan Ortalyq Aziia elderimen jasalǵan kelisimder negizinde kóktemde 11 milliard tekshe metr sý alatyn boldy. Bul týraly Sý resýrstary jáne irrigatsiia ministrligi málimdedi, dep habarlaidy Dalanews.kz.
Ministrlik málimetinshe, elge sý sáýir aiyna deiin jetkiziledi. Sý resýrstary jáne irrigatsiia ministri Nurjan Nurjigitov osy kelisimge qol jetkizgen.
Ortalyq Aziianyń Memleketaralyq sý sharýashylyǵyn úilestirý komissiiasynyń (MSShÚK) 88-otyrysy Dýshanbe qalasynda ótti. Jiynǵa Qazaqstan, Ózbekstan, Tájikstan jáne Túrikmenstannyń sý sharýashylyǵy salasyndaǵy jaýapty basshylary qatysty. Kezdesýde Syrdariia jáne Ámýdariia ózenderiniń basseinderindegi vegetatsiia aralyq kezeńniń ótý barysy talqylandy.
Ministr Nurjigitovtiń aitýynsha, bul kelisim jazǵy sýarý kezeńine qajetti sý qoryn jinaýǵa jáne elimizdiń ońtústik óńirlerindegi ekojúieni saqtaýǵa múmkindik beredi.
"Qazaqstannyń ońtústiginde jaǵdai batys pen soltústikten ózgeshe. Bul aimaqta kóktemgi sý tasqyny bolmaǵanymen, jazda sýarmaly sýǵa suranys óte joǵary. Sondyqtan biz ońtústik aimaqty sýmen qamtamasyz etý boiynsha arnaiy sharalardy qolǵa alyp otyrmyz. Sý diplomatiiasy – bizdiń basty basymdyqtarymyzdyń biri. Osy kelissózder nátijesinde ótken jyly da elimizdiń ońtústigin turaqty sýmen qamtamasyz ettik. Barlyq sý bólý jáne transshekaralyq sý nysandaryn qorǵaý máselelerin Ortalyq Aziia elderimen birlese otyryp sheshemiz", – dedi ministr.
Kelisim aiasynda sý kólemi Syrdariia ózeni arqyly Túrkistan oblysyndaǵy Shardara sý qoimasyna jetkiziledi. Onyń ishinde 1,6 milliard tekshe metri Aral teńizine baǵyttalady.
