قازاقستان ورتالىق ازيا ەلدەرىمەن جاسالعان كەلىسىمدەر نەگىزىندە كوكتەمدە 11 ميلليارد تەكشە مەتر سۋ الاتىن بولدى. بۇل تۋرالى سۋ رەسۋرستارى جانە يرريگاسيا مينيسترلىگى مالىمدەدى، دەپ حابارلايدى Dalanews.kz.
مينيسترلىك مالىمەتىنشە، ەلگە سۋ ءساۋىر ايىنا دەيىن جەتكىزىلەدى. سۋ رەسۋرستارى جانە يرريگاسيا ءمينيسترى نۇرجان نۇرجىگىتوۆ وسى كەلىسىمگە قول جەتكىزگەن.
ورتالىق ازيانىڭ مەملەكەتارالىق سۋ شارۋاشىلىعىن ۇيلەستىرۋ كوميسسياسىنىڭ (مسشۇك) 88-وتىرىسى دۋشانبە قالاسىندا ءوتتى. جيىنعا قازاقستان، وزبەكستان، تاجىكستان جانە تۇرىكمەنستاننىڭ سۋ شارۋاشىلىعى سالاسىنداعى جاۋاپتى باسشىلارى قاتىستى. كەزدەسۋدە سىرداريا جانە ءامۋداريا وزەندەرىنىڭ باسسەيندەرىندەگى ۆەگەتاسيا ارالىق كەزەڭنىڭ ءوتۋ بارىسى تالقىلاندى.
مينيستر نۇرجىگىتوۆتىڭ ايتۋىنشا، بۇل كەلىسىم جازعى سۋارۋ كەزەڭىنە قاجەتتى سۋ قورىن جيناۋعا جانە ەلىمىزدىڭ وڭتۇستىك وڭىرلەرىندەگى ەكوجۇيەنى ساقتاۋعا مۇمكىندىك بەرەدى.
"قازاقستاننىڭ وڭتۇستىگىندە جاعداي باتىس پەن سولتۇستىكتەن وزگەشە. بۇل ايماقتا كوكتەمگى سۋ تاسقىنى بولماعانىمەن، جازدا سۋارمالى سۋعا سۇرانىس وتە جوعارى. سوندىقتان ءبىز وڭتۇستىك ايماقتى سۋمەن قامتاماسىز ەتۋ بويىنشا ارنايى شارالاردى قولعا الىپ وتىرمىز. سۋ ديپلوماتياسى – ءبىزدىڭ باستى باسىمدىقتارىمىزدىڭ ءبىرى. وسى كەلىسسوزدەر ناتيجەسىندە وتكەن جىلى دا ەلىمىزدىڭ وڭتۇستىگىن تۇراقتى سۋمەن قامتاماسىز ەتتىك. بارلىق سۋ ءبولۋ جانە ترانسشەكارالىق سۋ نىساندارىن قورعاۋ ماسەلەلەرىن ورتالىق ازيا ەلدەرىمەن بىرلەسە وتىرىپ شەشەمىز"، – دەدى مينيستر.
كەلىسىم اياسىندا سۋ كولەمى سىرداريا وزەنى ارقىلى تۇركىستان وبلىسىنداعى شاردارا سۋ قويماسىنا جەتكىزىلەدى. ونىڭ ىشىندە 1،6 ميلليارد تەكشە مەترى ارال تەڭىزىنە باعىتتالادى.
