Qazaqstan munaiy Ońtústik Koreiaǵa tasymaldanady, dep habarlaidy Dalanews.kz.
Qazaqstan Respýblikasynyń Energetika ministrliginde strategiialyq energetikalyq seriktestiktiń keleshegin talqylaý úshin kelgen Koreia Respýblikasynyń ókiletti delegatsiiasymen birqatar jumys kezdesýleri ótken bolatyn.
Sapar aiasynda QR Energetika ministri Erlan Aqkenjenov Koreia Respýblikasynyń joǵary laýazymdy delegatsiiasymen kezdesý ótkizdi. Taraptar memleketter arasyndaǵy saiasi dialogtyń joǵary deńgeiin atap ótip, iri infraqurylymdyq jáne tehnologiialyq bastamalardy iske asyrýǵa ekijaqty múddelilikti rastady. Salalyq yntymaqtastyqtyń praktikalyq máseleleri Koreia Respýblikasynyń jańa Saýda, ónerkásip jáne resýrstar ministri Kim Chon Kvanmen ótken keńeitilgen kezdesýde talqylandy. Vedomstvo basshylary otyn-energetika keshenindegi birlesken jobalardy damytýdyń jańa kezeńiniń baǵyttaryn egjei-tegjeili qarastyrdy.
Kún tártibinde munai-gaz salasyndaǵy yntymaqtastyqqa erekshe kóńil bólindi. Qazaqstan tarapy Koreia ulttyq munai korporatsiiasynyń (KNOC) el naryǵyndaǵy tabysty ári kópjyldyq tájiribesin atap ótti. Sondai-aq qazaqstandyq shiki munaidy Ońtústik Koreiaǵa turaqty ári ózara tiimdi jetkizý máselesi boiynsha ortaq ustanymǵa keldi.
Elektr energetikasy da negizgi taqyryptardyń biri boldy. Bul saladaǵy basty seriktes – Doosan Enerbility korporatsiiasy. Kompaniia Atyraý oblysynda qýaty 310 MVt bolatyn «Qarabatan» bý-gaz qondyrǵysyn sátti iske asyrǵan. Qazirgi ýaqytta Túrkistan oblysynda qýaty 1000 MVt bolatyn iri jobanyń bas merdigeri bolyp jumys júrgizip jatyr.
Kezdesýler qorytyndysynda ońtústikkoreialyq kompaniialarǵa Qazaqstandaǵy jańa infraqurylymdyq jobalarǵa tek merdiger retinde emes, tolyqqandy birlesken investor retinde qatysý usynyldy.
Eki eldiń ókilderi aldaǵy ýaqytta da ozyq tehnologiialardy engizý arqyly ornyqty ekonomikalyq damýǵa negizdelgen strategiialyq energetikalyq áriptestikti nyǵaitýǵa niet bildirdi.
