Qazaqstan men Vetnam arasyndaǵy saýda-ekonomikalyq yntymaqtastyqty keńeitý máseleleri Úkimet deńgeiinde talqylandy, dep habarlaidy Dala News.
Premer-ministrdiń orynbasary – ulttyq ekonomika ministri Serik Jumanǵarin Vetnam Sotsialistik Respýblikasy Premer-ministriniń turaqty orynbasary Ngýen Hoa Binmen kezdesti. Taraptar sońǵy 30 jyldan astam ýaqytta eki el arasyndaǵy saiasi dialogtyń turaqty damyp kele jatqanyn jáne úkimetaralyq, parlamenttik bailanystardyń nyǵaiǵanyn atap ótti.
Serik Jumanǵarinniń aitýynsha, Qazaqstan men Vetnam basshylary saýda, investitsiia, kólik jáne logistika, agroónerkásip kesheni men aqparattyq tehnologiialar salalarynda yntymaqtastyqty tereńdetý jóninde naqty baǵyt aiqyndaǵan. Qazaqstan 2026 jylǵa deiin ózara taýar ainalymyn eki esege ulǵaitýdy maqsat etip otyr jáne biylǵy jyldyń ortasynda Vetnamǵa saýda-ekonomikalyq missiia jiberýge daiyn.
Kezdesý barysynda Qazaqstannyń Vetnamǵa segiz jyldyq úzilisten keiin alǵash ret 15 myń tonnadan astam bidai eksporttaǵany aityldy. 2025 jyly mýltimodaldy logistika arqyly konteinerlerdi qaita tieýsiz alǵashqy tikelei jetkizilimder iske qosylyp, bul tasymal merzimi men shyǵyndaryn qysqartýǵa múmkindik bergen. Atalǵan tájiribe Qazaqstandy Ońtústik-Shyǵys Aziia elderi úshin senimdi azyq-túlik jetkizýshi retinde tanytýǵa jol ashady.
Sonymen qatar eksporttyq áleýetti un, et jáne sút ónimderi, sondai-aq maily daqyldar esebinen keńeitý múmkindigi talqylandy. Osy oraida qazaqstandyq tarap veterinariia salasyndaǵy yntymaqtastyq týraly kelisimdi jedeldetip, ony aýyl sharýashylyǵy jónindegi kishi komitettiń ekinshi otyrysynda qol qoiýdy usyndy.
Investitsiialyq baǵytta da ilgerileý bar. Qazaqstanda vetnamdyq kapitaldyń qatysýymen birqatar joba júzege asyrylyp jatyr. Olardyń qatarynda Almaty oblysyndaǵy Ak Bulak Village týristik kesheni men Qonaev qalasyndaǵy «Arna» indýstriialyq aimaǵynda 90 mln dollar kólemindegi investitsiiamen salynatyn azyq-túlik óndirisi zaýyty bar.
Taraptar saýda-ekonomikalyq jáne ǵylymi-tehnikalyq yntymaqtastyq jónindegi Úkimetaralyq komissiianyń mańyzyn atap ótip, onyń kelesi otyrysyn maýsym–shilde ailarynda ótkizý múmkindigin qarastyrdy. Sondai-aq biyl Qazaqstan–Vetnam iskerlik keńesin qurý týraly memorandýmǵa qol qoiý usynyldy.
Kezdesý qorytyndysy boiynsha vetnamdyq tarap iskerlik keńes qurý bastamasyn qoldap, eki el arasyndaǵy saýda kólemin odan ári arttyrýǵa aitarlyqtai áleýet bar ekenin málimdedi.
