Astanada QR Premer-ministri Oljas Bektenov elimizge alǵashqy resmi saparymen kelgen Qyrǵyz Ministrler kabinetiniń tóraǵasy – Prezident Ákimshiliginiń basshysy Adylbek Qasymaliev shaǵyn jáne keńeitilgen quramda kelissózder júrgizdi, – dep habarlaidy Dalanews.kz.
Taraptar Qazaqstan Prezidenti Qasym-Jomart Toqaev pen Qyrǵyzstan Prezidenti Sadyr Japarov arasynda qol jetkizilgen ýaǵdalastyqtardyń júzege asyrylý barysyn qarady. Onda saýda-ekonomikalyq, investitsiialyq, tranzittik-kólik, sý-energetikalyq, týristik, mádeni-gýmanitarlyq yntymaqtastyq, sondai-aq AÓK-ke qatysty máselelerdiń keń aýqymy qamtyldy.
– Memleket basshylarymyzdyń ózara senim men shynaiy dostyq rýhyndaǵy turaqty bailanystary bizdiń kópqyrly qatynastarymyzdy jańa belesterge kóterýge yqpal etti. Saýda bailanystaryn nyǵaitý jáne tereńdetý eki el ekonomikasynyń damýyna mýltiplikativti áser etedi. Ótken jyldyń qorytyndysy boiynsha ózara saýda kórsetkishteri taǵy da artyp, $1,7 mlrd-ty qurady. Sonymen qatar biz saýda-ekonomikalyq ózara is-qimyldy odan ári keńeitý úshin aitarlyqtai áleýetti kórip otyrmyz, – dep atap ótti Oljas Bektenov.
– Shyn máninde, eki baýyrlas memleket arasyndaǵy ekijaqty yntymaqtastyǵy erekshe strategiialyq sipatqa ie. Ejelden baýyrlas halyqtarymyzdy ǵasyrlar boiy qalyptasqan dostyq, tatý kórshilik jáne týysqandyq qarym-qatynas, ortaq mádeniet, til, tipti salt-dástúrimiz bailanystyrady. Bul kezdesý eki tarapty da qyzyqtyratyn kóptegen máseleler boiynsha pikir almasýǵa, eki eldiń múddelerine sai keletin jańa usynystar ázirleýge múmkindik beredi dep senemin, – dep atap ótti Adylbek Qasymaliev.
Kelissózder barysynda áleýetti ashý jáne taýar ainalymyn arttyrý tetikteri talqylandy.
Tranzittik-kólik salasynda qazaq-qyrǵyz shekarasynyń ótkizý qabiletin arttyrý boiynsha keshendi sharalar iske asyrylýda. Shekarada «Aqsý» – «Kamyshanovka» jáne «Besaǵash» – «Kichi-Kapka» beketteri siiaqty avtomobil ótkizý pýnktterin jańǵyrtý jáne keńeitý jumystary júrgizilýde. Sondai-aq «Sortóbe» – «Tokmok» jáne «Aýqatty» – «Ken-Býlýn» ótkizý beketterin damytý josparlanǵan.
Sý-energetika salasyndaǵy yntymaqtastyqqa erekshe kóńil bólinedi. Shý jáne Talas ózenderi boiynda vegetatsiialyq kezeńde sýmen qamtamasyz etý, Kirov sý qoimasyn qaýipsiz paidalaný jáne óńirlik energetikalyq qaýipsizdik máseleleri talqylandy.
Týrizm – ózara tiimdi yntymaqtastyqtyń mańyzdy baǵyty. Jańa týristik baǵyttardy damytý sharalary onyń ishinde, transshekaralyq eko-baǵyttar qurý, belsendi týrizm úshin infraqurylymdy damytý jáne qonaq úi biznesine investitsiialar tartý máseleleri talqylandy.
Mádeni-gýmanitarlyq yntymaqtastyq jelisi boiynsha biyl Qyrǵyzstanda Qazaq kinosy kúnderin ótkizý josparlanǵan, sondai-aq Qyrǵyzstan aýmaǵynda qazaqstandyq joǵary oqý oryndarynyń filialdaryn ashý máseleleri pysyqtalýda.
Kelissózder qorytyndysy boiynsha Premer-ministr Oljas Bektenov Qazaqstan Úkimeti qazaq-qyrǵyz saýda-ekonomikalyq áriptestiginiń joǵary serpinin qoldaýǵa daiyn ekenin atap ótti.
