Qazaqstan men Germaniia jalpy quny 54,2 mlrd dollar bolatyn 44 jobany qamtityn investitsiialyq yntymaqtastyqty damytýǵa nietti. Berlinde ótken Qazaqstan–Germaniia biznes-forýmynda taraptar 2026–2028 jyldarǵa arnalǵan Jol kartasyna qol qoiyp, ónerkásip, tehnologiia jáne shikizatty óńdeý salalarynda jańa jobalardy júzege asyrýǵa ýaǵdalasty, dep habarlaidy dalanews.kz.
Qujattar Prezident Qasym-Jomart Toqaevtyń Germaniiaǵa resmi sapary aiasynda rásimdeldi. Forýmǵa eki eldiń memlekettik organdary men isker toptarynyń ókilderi qatysty.
Ónerkásip jáne qurylys ministri Ersaiyn Naǵaspaevtyń aitýynsha, Germaniia Qazaqstan ekonomikasynyń mańyzdy investitsiialyq seriktesteriniń biri sanalady. 2005 jyldan beri nemis kompaniialary elimizge 8 mlrd dollardan astam tikelei investitsiia salǵan. Onyń 90 paiyzǵa jýyǵy óńdeý ónerkásibine baǵyttalǵan.
Qazir Qazaqstanda nemis kapitalynyń qatysýymen 1100-den astam kásiporyn jumys isteidi. Eki eldiń birlesken investitsiialyq portfelinde jalpy quny 54,2 mlrd dollar bolatyn 44 joba bar.
"Qazaqstan nemis biznesimen tyǵyz ári senimdi seriktestik ornatýǵa daiyn. Ozyq tehnologiialarymyzdy, investitsiia men resýrstardy biriktirý arqyly eki eldiń ekonomikasyna tiimdi, ornyqty ónerkásiptik yntymaqtastyq qalyptastyra alamyz", – dedi Ersaiyn Naǵaspaev.
Forým aiasynda qazaqstandyq ministr Germaniianyń ekonomika jáne energetika federaldyq ministri Katerina Raihemen kelissóz ótkizdi. Taraptar mineraldyq-shikizat qorlaryn igerý, tehnologiia transferi jáne shikizatty tereń óńdeý máselelerin talqylady.
Kezdesýdiń negizgi nátijesi – Qazaqstan men Germaniianyń 2026–2028 jyldarǵa arnalǵan ónerkásiptik, tehnologiialyq jáne shikizat salalaryndaǵy yntymaqtastyǵyn damytý jónindegi Jol kartasynyń qabyldanýy boldy. Qujat aldaǵy úsh jylda ortaq jobalardy ázirlep, ekijaqty bailanysty keńeitýdi kózdeidi.
Sonymen qatar Qazaqstannyń Ónerkásip jáne qurylys ministrligi WILO Central Asia kompaniiasymen sorǵy júielerin elimizde óndirýge qatysty memorandým jasasty. Al Deutsche Bahn AG kompaniiasymen temirjol mashina jasaý salasyndaǵy áriptestik týraly kelisimge qol qoiyldy.
Jańa ýaǵdalastyqtar óndiristi jergiliktendirý, tehnologiia almasý, shikizatty óńdeý jáne temirjol salasyna qajetti tehnikany shyǵarý baǵyttaryn qamtidy. Endi taraptar kelisilgen jobalardy úsh jyldyq jospar aiasynda júzege asyrýǵa kirispek.
