Qazaqstan Kaspii qubyr konsortsiýmynyń (KQK) infraqurylymyna jasalǵan sońǵy shabýyldan keiingi shyǵyn kólemin baǵalap jatyr. Bul týraly energetika ministri Erlan Aqkenjenov málimdedi, dep habarlaidy Dalanews.kz.
Ministrdiń aitýynsha, buǵan deiin Energetika ministrligi azamattyq jáne asa mańyzdy infraqurylym nysandaryna shabýyl jasaýǵa jol berilmeitini jóninde resmi málimdeme jasaǵan.
"Qazaqstanda óndiriletin munaidyń 80 paiyzy Kaspii qubyr konsortsiýmy arqyly tasymaldanatyny eshkimge qupiia emes. Bul konsortsiým halyqaralyq zańnamaǵa sáikes qurylǵan. Onyń aktsionerleriniń basym bóligi - Eýropa, AQSh jáne Qazaqstan kompaniialary. Tek az ǵana úlesi reseilik kompaniiaǵa tiesili", - dedi Erlan Aqkenjenov.
Sondai-aq ministr bir shetki ailaq qurylǵysyna (ShAQ) keltirilgen zaqymnyń sipaty men qalpyna keltirý jumystarynyń barysyna toqtaldy.
"Nysanda shamamen 2,5 na 3 metr kóleminde úlken tesik paida bolǵan. Bul baǵyttalǵan jarylys saldarynan oryn alǵan. Qazirgi tańda súńgýirler osy ShAQ-tyń júzý qabiletin qalpyna keltirý jumystaryn júrgizip jatyr. Kelesi kezeńde qurylǵynyń ishine kirip, tehnologiialyq jabdyqtardyń zaqymdaný deńgeiin baǵalaý qajet bolady. Eger jóndeý jumystaryn júrgizý múmkindigi bolsa, ShAQ-2 de qaitadan paidalanýǵa beriledi", - dedi ministr.
Onyń aitýynsha, qatar júrgizilip jatqan taǵy bir baǵyt - jańa jabdyqty aýystyrý jumystary.
"Qalpyna keltirý jumystaryna qaramastan, Energetika ministrligi men ulttyq munai-gaz kompaniiasy Birikken Arab Ámirlikterinde óndirilgen eki jańa shetki ailaq qurylǵysyn jetkizý boiynsha barlyq múmkindikti qarastyryp jatyr. Bastapqyda jetkizý sáýir aiyna josparlanǵan edi, alaida qazir logistika qaita pysyqtalyp, olardy qańtar aiynda jetkizý kózdelip otyr", - dep túsindirdi Erlan Aqkenjenov.
Ekonomikalyq saldarǵa toqtalǵan ministr shyǵyndy baǵalaý protsesi júrip jatqanyn, alaida bul máselege qatysty túsinikteme berý ózge vedomstvolardyń quzyretinde ekenin aitty.
"Shyǵyn kólemin baǵalaý máselesi premer-ministrdiń orynbasary - ulttyq ekonomika ministrine joldandy. Qazir tiisti esep júrgizilip jatyr. Aldaǵy jaǵdaiǵa bailanysty pikirdi, meniń oiymsha, Syrtqy ister ministrligi bildiredi. Energetika ministrligi tarapynan saiasi málimdeme jasalmaidy, sebebi biz - energetika salasyndaǵy saiasatty iske asyratyn organbyz", - dep túiindedi ol.
