Qazaqstanda sý kóp qajet etetin daqyldardyń ornyna áleýmettik mańyzy bar ári tabysty ónimderge nazar aýdarylady, dep habarlaidy Dalanews.kz.
Prezidenttiń aýyl sharýashylyǵy jalpy óniminiń kólemin eki eseleý jónindegi tapsyrmasyn oryndaý úshin ázirlengen Jol kartasy aiasynda egis alqaptaryn ártaraptandyrý sharalary kúsheitilip jatyr.
2025 jyly eldegi jalpy egis kólemi 322,8 myń gektarǵa artyp, 23,6 mln gektarǵa jetti (2024 jyly – 23,3 mln ga). Dándi jáne dándi-burshaqty daqyldardyń kólemi 630 myń gektarǵa qysqaryp, 16 mln gektardy qurady. Al bidai alqaby 884,6 myń gektarǵa azaiyp, 12,3 mln gektar boldy.
Bos qalǵan jerler joǵary tabysty daqyldarǵa bólindi. Kúnbaǵys alqaby rekordtyq kórsetkishke jetip, 1,8 mln gektarǵa ulǵaidy. Bul ótken jylmen salystyrǵanda 481,5 myń gektarǵa kóp. Kartop egistigi de ulǵaiyp, 9,3 myń gektarǵa ósip, 131,2 myń gektarǵa jetti. Onyń ishinde iri sharýashylyqtardaǵy kólem 12,5 myń gektarǵa artyp, 84,5 myń gektardy qurady.
Sonymen qatar sý kóp qajet etetin daqyldardyń kólemi qysqartylýda. 2025 jyly maqta 144,5 myń gektarǵa egildi, onyń 50 myń gektary tamshylatyp sýarý ádisimen. Qyzylorda oblysynda kúrish egistigi 85,6 myń gektardan 80,9 myń gektarǵa azaidy.
Aýyl sharýashylyǵy ministrliginiń baǵalaýynsha, egis alqaptaryn ártaraptandyrý ishki azyq-túlik teńgerimin nyǵaityp, jekelegen daqyldarǵa táýeldilikti azaitady. Bul agroónerkásip kesheniniń turaqtylyǵyn arttyryp, fermerlerdiń tabysyn kóbeitýge yqpal etedi. Jer resýrstaryn tiimdi paidalaný – eldiń azyq-túlik qaýipsizdiginiń negizi bolýy tiis.
