Sońǵy jyldary bizde munai óndirip júrgen osy eki sheteldik investor tym qutyryp ketken bolatyn. Olardyń Qarashyǵanaq pen Qashaǵan jobasyndaǵy áreketteri, atap aitqanda investitsiialyq mindettemelerin oryndamaýy, Nazarbaev dáýirindegidei "zań buzsaq ta Qazaqstan bizge dym istei almaidy" dep oilaýy bir kúni ózderin jarǵa jyqpaq. Sebebi, derekkózdiń aitýynsha, osy aptada, jabyq esik artyndaǵy úlken kabinetterde Eni men Shell-diń mindettemelerin oryndamaǵan ár faktisin qatań tirkep, kelisimge sai sanktsiialar qoldaný týraly áńgime júrgen, dep habarlaidy Dalanews.kz.
"Qashaǵanda da, Qarashyǵanaqta da Eni men Shell ózderi ýáde etken nárselerdi jasamai, ýaqyt sozýmen keledi. Qit etse jobanyń qunyn qymbattatyp, jańa smeta kórsetýge mashyqtanyp alǵan. Bular Qarashyǵanaqta gaz óńdeý zaýytyn salý jobasyn ótirik qymbattatyp, sózbuidaǵa salyp keldi. Qashaǵanda ken ornyn keńeitýdiń ekinshi fazasyn tipti bastaǵan da joq. Qazaqstan Úkimetin aqymaq bala siiaqty kóredi. Ýaqyt sozyp, investitsiia salmai, tez arada munailaryn óndirip satyp, maksimaldy paida alyp ketkisi keledi", - deidi, DALA INSIDE arnasynyń PSA jaqqa jaqyn derekkózi.
Qazir Qazaqstan Qarashyǵanaqtaǵy gaz óńdeý zaýyty (GÓZ) jobasyn tolyǵymen toqtatty. Bul jobany Qarashyǵanaq operatory KPO quziretinen alyp tastap, Qazmunaigaz ózi qytai kompaniialaryn shaqyra otyryp aiaqtaýy múmkin. Sebebi KPO bastapqy GÓZ jobasynyń baǵasyn jaqynda taǵy 1 milliard dollarǵa qymbattatyp jiberdi. Al KPO-nyń negizgi aktsionerleri (58,5%) osy Eni men Shell. Bul ekeýi túrli jobalardy qymbattatý arqyly Qazaqstannyń bolashaq tabysynan shamamen 3,5 milliard dollar jep qoiǵan.
"Eni men Shell buryn-sońdy bolmaǵan investorlyq jeńildik rejiminde jumys isteýde. Olar munaidan eksportty baj salyǵyn da tólemeidi. Qazaqstanǵa tabystyń 2 paiyzyn ǵana tatyrady. Týra osyndai jaǵdai máńgi bolǵanyn qalaidy. Sol úshin bizden Qashaǵan boiynsha kelisimniń sozylýyn talap etýde. Al investitsiia quiyp shyǵyndanbas úshin investjobalardy ádeii sozyp, baǵasyn qymbattatyp, "volokita" jasap keledi, - deidi derekkóz.
Endi Qazaqstan olardyń qýlyǵyn bildi jáne budan bylai "aqymaq bala" rólin oinaýǵa daiyn emes. Kelesi aptadan bastap Eni men Shell-ge qatysty ritorika qatańdaityn bolady.
Buǵan deiin saitymyzda "Qashaǵanda óndirilip jatqan barlyq munaidyń 2 paiyzy ǵana Qazaqstanǵa buiyrady. Nege?" degen maqala jariialanǵan bolatyn. Maqalada munaigaz salasynyń sarapshysy, Energy Monitor qoǵamdyq qorynyń direktory, Energy Monitor Telegram arnasynyń avtory Nurlan Jumaǵulovtyń suqbatynan úzindi keltiriledi.
