Jýyrda Halyqaralyq valiýta qory Qazaqstan missiiasynyń qorytyndysy boiynsha esep jariialady. Qor sarapshylary byltyr qarasha aiynda elge kelip, ekonomikanyń qazirgi ahýalyn baǵalap, negizgi úrdisterge taldaý jasaǵan, dep habarlaidy Dalanews.kz.
QZ Economy.Taldaý telegram arnasy halyqaralyq uiymnyń qorytyndysyn jariialady. Ondaǵy málimetke súiensek, Qazaqstan ekonomikasy oń serpin alyp, ornyqty damý jolyna bet alǵan.
Ekonomikalyq ósimniń negizgi draiverleri
HVQ dereginshe, 2025 jyly Qazaqstan ekonomikasy joǵary qarqynmen ósken. Bul ósim ishki suranystyń artýy, munai óndirý kóleminiń ulǵaiýy, munaidan tys salalardaǵy iskerlik belsendilik pen iri infraqurylymdyq jobalardyń iske asýy esebinen qamtamasyz etilgen. Buǵan qosa, yntalandyrýshy fiskaldyq saiasat pen memlekettik kásiporyndardyń investitsiialary da mańyzdy ról atqarǵan.
Ekonomikany qurylymdyq turǵyda jańǵyrtý, shikizat eksportyna táýeldilikti azaityp, óńdeý salasyna, logistika men infraqurylymǵa basymdyq berý naqty nátije bere bastaǵan. Sonyń aiǵaǵy - 2025 jylǵy 6,5 paiyzdyq ekonomikalyq ósim.
Qai salalar alǵa shyqty?
• óńdeý ónerkásibi – 6,4%
• kólik salasy – 20,4%
• qurylys – 15,9%
• saýda – 8,9%
• aýyl sharýashylyǵy – 5,9%
Bul kórsetkishter ekonomikanyń naqty sektory damyp jatqanyn jáne onyń qurylymynyń kúrdelene túskenin ańǵartady. Mundai ekonomika syrtqy kúizelisterge áldeqaida tózimdi keledi.
Qarjylai turaqtylyq pen rezervter
HVQ Qazaqstannyń fiskaldyq jáne syrtqy rezervterin jetkilikti deńgeide dep baǵalaidy. Sonymen qatar bank sektorynyń turaqtylyǵy da atap ótilgen. Qazirgi tańda altyn-valiýta rezervteri men Ulttyq qor aktivteriniń jiyntyq kólemi 125 mlrd AQSh dollaryna jetken. Bul eldiń qarjylyq qaýipsizdigin kúsheitip, jahandyq daǵdarystar jaǵdaiynda «qorǵanysh jastyq» qyzmetin atqarady.
Infliatsiiamen kúres: durys baǵyt
Qor sarapshylary infliatsiiany tómendetýge baǵyttalǵan saiasatty da oń baǵalap otyr. Bazalyq mólsherlemeni arttyrý, artyq ótimdilikti shekteý, Úkimet, Ulttyq bank jáne qarjy naryǵyn retteý organdarynyń birlesken is-qimyly infliatsiiany maqsatty deńgeige 10 paiyzdan tómen kórsetkishke jaqyndatýǵa múmkindik beredi.
Bul kúrdeli ári uzaq protsess bolǵanymen, onyń qajettiligi kúmán týdyrmaidy. Ásirese, azyq-túlik pen kúndelikti tutyný taýarlaryn óndiretin jańa kásiporyndardy qoldaý infliatsiialyq qysymdy azaitýdyń mańyzdy tetigi sanalady.
Usynystar men táýekelder
Sonymen qatar HVQ ekonomikany ártaraptandyrý úshin qurylymdyq reformalardy jedeldetý qajettigin atap ótedi. Atap aitqanda, memleket úlesin qysqartý, jeke sektor men qarjy naryǵyn damytý, iskerlik klimat pen korporativtik basqarý sapasyn jaqsartý usynylady.
Árine, táýekelder de joq emes: negizgi saýda seriktesterindegi ósimniń baiaýlaýy, geosaiasi belgisizdik, munai baǵasynyń qubylýy. Soǵan qaramastan, halyqaralyq sarapshylar 2025 jyly Qazaqstan ekonomikasynyń ósimi 6,2 paiyzǵa deiin jedeldeýi múmkin dep boljaidy.
Túiin
Bul baǵalaýlar Qazaqstan úshin jańalyq emes. Reformalar júrgizilip jatyr, infliatsiiamen kúres ashyq ári júieli túrde iske asýda, táýekelder de jasyrylmai aitylady. Eń bastysy - el ekonomikasyndaǵy oń ózgeristerdi tek ishki aýditoriia ǵana emes, táýelsiz halyqaralyq sarapshylar da moiyndap otyr.
