Qazaqstan ekonomikasynyń biylǵy qańtar-shilde ailaryndaǵy ósimine qatysty resmi derekter jariialandy. Málimetterge sáikes, syrtqy naryqtardaǵy turaqsyzdyq pen túrli ekonomikalyq syn-qaterlerge qaramastan, el ekonomikasy turaqty ósim kórsetip otyr, dep habarlaidy dalanews.kz.
Ulttyq statistikaǵa sáikes, 2026 jyldyń alǵashqy jeti aiynda Qazaqstannyń jalpy ishki ónimi (JIÓ) 4,1%-ǵa ósti. Bul kórsetkish birinshi jartyjyldyqtaǵy deńgeimen shamalas bolǵanymen, sarapshylar ony ekonomika turaqtylyǵynyń belgisi retinde baǵalaidy.
Mamandardyń aitýynsha, munai óndirý kólemi 8,9%-ǵa tómendep, álemdik naryqtarda qubylmalylyq saqtalǵanyna qaramastan, JIÓ ósimi báseńdegen joq. Buǵan negizgi úlesti shikizattyq emes sektor qosty. Atalǵan salanyń ósimi 5,4%-dy qurady.
Óńdeý ónerkásibi qarqyndy damyp jatyr
Ekonomikanyń naqty sektoryndaǵy eń joǵary ósim óńdeý ónerkásibinde tirkeldi. Saladaǵy óndiris kólemi bir jylda 9%-ǵa artqan.
Ósim kórsetken negizgi baǵyttar:
mashina jasaý – 22%;
tamaq ónimderin óndirý – 13,9%;
himiia ónerkásibi – 26,9%;
farmatsevtika óndirisi – 38,5%;
qurylys materialdaryn shyǵarý – 9,4%;
daiyn metall buiymdaryn óndirý – 35%.
Sarapshylar muny óndiristik áleýettiń kúsheiýimen jáne óńdeýshi sektorǵa investitsiialardyń artýymen bailanystyrady.
Shikizattyq emes salalar ekonomikanyń qozǵaýshy kúshine ainalýda
Óńdeý ónerkásibinen bólek, birqatar basqa salalar da oń dinamika kórsetti:
qurylys – 15,3%;
kólik jáne qoimalaý – 7,4%;
saýda – 5,9%;
aýyl sharýashylyǵy – 5%;
bailanys salasy – 4,3%.
Ekonomisterdiń pikirinshe, sońǵy jyldary aýyl sharýashylyǵy, logistika jáne óndiris salalaryna investitsiia kóleminiń artýy jańa jobalardyń iske qosylýyna múmkindik berdi. Nátijesinde shikizattyq emes sektorlardyń ekonomikadaǵy úlesi kúsheiip keledi.
Mysaly, ótken jyldyń qorytyndysy boiynsha munai óndirý salasynyń JIÓ qurylymyndaǵy úlesi 8%-dan tómen túsken.
Ekonomikanyń munaiǵa táýeldiligi azaiyp keledi
Buryn Qazaqstan ekonomikasynyń ósimi kóbine shikizat naryǵyndaǵy jaǵdaiǵa bailanysty bolatyn. Munai óndirisi tómendese, JIÓ ósimi de baiaýlap, al óndiris artsa, ekonomika qarqyn alatyn.
Qazirgi statistika bul táýeldiliktiń álsirep kele jatqanyn kórsetedi. Sarapshylar muny ekonomikany ártaraptandyrý saiasatynyń nátijesi dep baǵalaidy.
Ónerkásiptik áleýettiń kúsheiýi, damý institýttarynyń belsendi jumysy, kólik infraqurylymynyń jańarýy, otandyq óndirýshiler men shaǵyn jáne orta biznesti qoldaý sharalary ekonomikanyń jańa ósim núktelerin qalyptastyryp jatyr. Sonymen qatar investitsiialar da barǵan saiyn shikizattyq emes salalarǵa baǵyttalýda.
Osynyń nátijesinde Qazaqstan ekonomikasy syrtqy faktorlarǵa tózimdi bolyp, turaqty ósim traektoriiasyn saqtap keledi.
