DALA INSIDE derekkóziniń sózinshe, kúshtik qurylymdardyń barlyǵyna baǵanyń negizsiz kóterilýine áser etip júrgen deldaldardy quryqtaýǵa pármen berildi. Tipti qajet bolsa Ulttyq qaýipsizdik komitetiniń tehnikalyq múmkindigin de paidalanýǵa bolady. Onymen birge, taýar óndirýshiler men satýshylar, iaǵni dúkender men marketpleisterdiń arasyna deldal kire almaityn mehanizm qurý isi Saýda jáne integratsiia ministrligi men barlyq ákimdikterge tapsyryldy.
"Qazaqstan sońǵy 10 jylda deldaldyq ekonomikaǵa tolyq kóship ketken. Sýbpodriadtyń sýdpodriady paida boldy. Ol baǵanyń joq jerden ósýine, osy baǵaǵa usynylǵan taýar men qyzmettiń óte sapasyz bolýyna alyp keldi. Mysaly, 1 million teńge turatyn jer qazatyn tapsyrysty shyn máninde tizbektiń eń sońyndaǵy bir jumysshy ary ketse 100 myń teńgege isteidi. Al aradaǵy 900 myń teńgeni sol tapsyrysty jeń ushynan alyp alǵan deldaldar julyp ketedi. 100 myń teńgege jalǵyz adam istegen jumystyń sapasy da bolmaidy. Sonda deldaldar ekonomikaǵa eshqandai taýar nemese qyzmet engizip, qundylyq týdyrmaidy. Kerisinshe orynsyz infliatsiia paida bolady", - deidi derekkóz.
Ásirese, aýyl sharýashylyǵy men qurylys, jol jóndeý saalaryndaǵy deldaldyqqa basym nazar aýdaryldy. Fermerlerden ónimdi tym arzanǵa alyp ketip, aqyrǵy satýshyǵa eki ese baǵasymen jetkizetin posrednikterdi alyp tastap, ornyna fermerdiń tikelei saýda ornyna jetýi oilastyrylýda. Memlekettiń oiynsha, qymbatshylyqtyń 40 paiyzyna deldaldar kináli. Qazir elimizdegi resmi infliatsiianyń jyldyq deńgeii 13 paiyzǵa jetip qaldy. Qymbatshylyqtyń shyn máninde órship turǵanyn barlyq satylardaǵy túrli qyzmet ókilderi de qysylmai aita bastaǵan.
Osyny paidalanǵan syrtqy jáne ishki kúshter qymbatshylyqty alǵa tartyp halyqty kóshege shyǵarǵysy da keldi. Sondyqtan el biligine dál qazir qymbatshylyqpen barlyq deńgeide aiaýsyz kúres júrgizý qajet bolyp tur. Osy seń qozǵala bastaǵanǵa uqsaidy.
