Qazaqstan Almatyda ashylatyn BUU-nyń óńirlik ortalyǵyn qarjylandyrý úshin jyl saiyn 3 million dollar bóletin boldy. Tiisti kelisimdi Senat depýtattary ratifikatsiialady, dep habarlaidy dalanews.kz.
Ortalyq Almatyda ashylady
Senat otyrysynda Qazaqstan úkimeti men Birikken Ulttar Uiymy arasyndaǵy Almaty qalasynda BUU-nyń óńirlik ortalyǵyn qurý týraly kelisim maquldandy. Qujatqa sáikes, Qazaqstan qabyldaýshy tarap retinde 2025-2029 jyldar aralyǵynda jyl saiyn erikti jarna túrinde 3 million dollardan bólip otyrady.
Qarajat qaida jumsalady?
Bólinetin qarjy ortalyqty zamanaýi materialdyq-tehnikalyq quraldarmen jabdyqtaýǵa, IT-infraqurylym men bailanys júielerin qamtamasyz etýge, sondai-aq aǵymdaǵy operatsiialyq shyǵyndardy óteýge baǵyttalady. Sonymen qatar bólinetin qarajattyń 13 paiyzy BUU tarapynan kórsetiletin ákimshilik súiemeldeýge jumsalmaq.
Ǵimarat keiin memleketke qaitarylady
Kelisim sharttaryna sáikes, baǵdarlamanyń merzimi aiaqtalǵannan keiin ortalyq ornalasqan ǵimarat tolyqtai Qazaqstan úkimetiniń qaramaǵyna qaitarylady. Aita keteiik, Almatyda BUU-nyń óńirlik ortalyǵyn qurý bastamasy uiymnyń Ortalyq Aziia men Aýǵanstan baǵytyndaǵy qyzmetin úilestirýdi kúsheitýge baǵyttalǵan.
