Qazaqstan BUU-nyń Qaýipsizdik Keńesiniń tóraǵasy mindetin atqarýǵa kiristi
SIM-niń málimeti boiynsha, BUU Qaýipsizdik Keńesine múshe elderdiń turaqty ókilderi qańtar aiyndaǵy tóraǵalyq baǵdarlamasyn qańtardyń 2-i kúni qarastyryp, qabyldaidy dep josparlanǵan. Seisenbide Qaýipsizdik Keńesi jumysynyń baǵdarlamasy týraly brifingter ótkizilmek. "Qazaqstannyń bastamasymen Qaýipsizdik Keńesiniń turaqty emes músheleri retinde eki jyldyq merzimge sailanǵanyna bailanysty Qaýipsizdik Keńesinde alǵash ret Kot-d'Ivýar, Kýveit, Niderland, Perý, Polsha jáne Ekvatorialdy Gvineia elderiniń týlaryn resmi túrde ornatý rásimi ótedi" dep habarlaidy SIM.
Qańtardyń 18-i kúni Qazaqstan prezidenti Nursultan Nazarbaevtyń tóraǵalyǵymen BUU Qaýipsizdik Keńesi músheleriniń "Jappai qyryp-joiý qarýyn taratpaý: senimdi nyǵaitý sharalary" taqyrybynda joǵary deńgeidegi taqyryptyq pikirtalastary ótedi. Sapar barysynda, buǵan deiin habarlanǵandai, Nazarbaev AQSh prezidenti Donald Tramppen kezdesedi dep josparlanǵan.
Astana BUU Qaýipsizdik Keńesiniń tóraǵasy qyzmetindegi basymdyqtary retinde iadrolyq qarýsyz álemdi jaqyndatý; jahandyq soǵys qaterin boldyrmaý jáne jergilikti janjaldardy retteý; aimaqtyq qaýipsizdik pen yntymaqtastyqty nyǵaitýda Ortalyq Aziianyń múddelerin ilgeriletý; terrorizmge qarsy kúres jáne ózge maqsattardy atap otyr.
Qazaqstan biligi táýelsizdigin jariialaǵaly beri ótken 26 jyldyń ishinde eldiń úlken jetistikterge qol jetkizgeni jáne álemge tanymal bolǵany týraly aitady. Halyqaralyq quqyq qorǵaýshy uiymdar resmi Astanany elde ózge pikirdegilerdi qýdalap, negizgi quqyqtar men bostandyqtardy shekteitini jáne túrmede saiasi tutqyndardy ustap otyrǵany úshin synap keledi.
