Májiliste Almaty qalasynan konsýldyq mekeme salý úshin AQSH úkimetine jer telimin jalǵa berýdi kózdeıtin zań jobasy qarala bastady, dep habarlaıdy Dalanews.kz.
Kelisim týraly negizgi derekter:
- Ornalasqan jeri:Almaty qalasy
- Telimniń aýmaǵy:70 000 m²-den astam
- Jalǵa berý merzimi:49 jyl
- Maqsaty:konsýldyq ǵımaratyn salý jáne paıdalaný
Atalǵan kelisimge 2024 jyly 27 qyrkúıekte Nú-Iorkte qol qoıylǵan.
Depýtat Aıgúl Quspannyń túsindirýinshe, qujat erejeleri jalǵa alý tártibi men sharttaryn retteıdi. Halyqaralyq ister, qorǵanys jáne qaýipsizdik jónindegi komıtet zań jobasy boıynsha qorytyndy daıyndaıtyn bolady.
Eske salaıyq, buǵan deıin Qazaqstan Úkimetiniń qaýlysy jarıalanǵan edi.
“Qazaqstan Respýblıkasynyń Úkimeti Amerıka Qurama Shtattarynyń Úkimetine Almaty qalasyndaǵy AQSH-tyń konsýldyq mekemesiniń ǵımaratyn salý úshin jer ýchaskesin jalǵa berý týraly kelisimniń jobasy maquldansyn”, – delingen edi qaýlyda.
Kelisim jobasyna sáıkes Almaty qalasyndaǵy Jamaqaeva kóshesi, Ál-Farabı dańǵyly, Seıfýllın dańǵyly, Aldara Kóse kóshesiniń arasynda ornalasqan jer ýchaskesi jalǵa beriledi. Jaldaý merzimi shart jasalǵan kúnnen bastap 49 jyl dep eseptelingen. Bul rette jaldaý merzimi taǵy 49 jylǵa uzartylýy múmkin. Ýchaske aýdany – 70 593 sharshy metr.
“Jalǵa alý aqysy (jalpy uzaqtyǵyna shekteýsiz) 25 301 016 dollar jáne osy kelisim kúshine engen kúnnen bastap 30 kúntizbelik kún ishinde bir rettik tólemmen tólenedi”, – delingen kelisim jobasynda.
