ماجىلىستە الماتى قالاسىنان كونسۋلدىق مەكەمە سالۋ ءۇشىن اقش ۇكىمەتىنە جەر تەلىمىن جالعا بەرۋدى كوزدەيتىن زاڭ جوباسى قارالا باستادى، دەپ حابارلايدى Dalanews.kz.
كەلىسىم تۋرالى نەگىزگى دەرەكتەر:
- ورنالاسقان جەرى:الماتى قالاسى
- تەلىمنىڭ اۋماعى:70 000 م²-دەن استام
- جالعا بەرۋ مەرزىمى:49 جىل
- ماقساتى:كونسۋلدىق عيماراتىن سالۋ جانە پايدالانۋ
اتالعان كەلىسىمگە 2024 جىلى 27 قىركۇيەكتە نيۋ-يوركتە قول قويىلعان.
دەپۋتات ايگۇل قۇسپاننىڭ تۇسىندىرۋىنشە، قۇجات ەرەجەلەرى جالعا الۋ ءتارتىبى مەن شارتتارىن رەتتەيدى. حالىقارالىق ىستەر، قورعانىس جانە قاۋىپسىزدىك جونىندەگى كوميتەت زاڭ جوباسى بويىنشا قورىتىندى دايىندايتىن بولادى.
ەسكە سالايىق، بۇعان دەيىن قازاقستان ۇكىمەتىنىڭ قاۋلىسى جاريالانعان ەدى.
“قازاقستان رەسپۋبليكاسىنىڭ ۇكىمەتى امەريكا قۇراما شتاتتارىنىڭ ۇكىمەتىنە الماتى قالاسىنداعى اقش-تىڭ كونسۋلدىق مەكەمەسىنىڭ عيماراتىن سالۋ ءۇشىن جەر ۋچاسكەسىن جالعا بەرۋ تۋرالى كەلىسىمنىڭ جوباسى ماقۇلدانسىن”، – دەلىنگەن ەدى قاۋلىدا.
كەلىسىم جوباسىنا سايكەس الماتى قالاسىنداعى جاماقايەۆا كوشەسى، ءال-فارابي داڭعىلى، سەيفۋللين داڭعىلى، الدارا كوسە كوشەسىنىڭ اراسىندا ورنالاسقان جەر ۋچاسكەسى جالعا بەرىلەدى. جالداۋ مەرزىمى شارت جاسالعان كۇننەن باستاپ 49 جىل دەپ ەسەپتەلىنگەن. بۇل رەتتە جالداۋ مەرزىمى تاعى 49 جىلعا ۇزارتىلۋى مۇمكىن. ۋچاسكە اۋدانى – 70 593 شارشى مەتر.
“جالعا الۋ اقىسى (جالپى ۇزاقتىعىنا شەكتەۋسىز) 25 301 016 دوللار جانە وسى كەلىسىم كۇشىنە ەنگەن كۇننەن باستاپ 30 كۇنتىزبەلىك كۇن ىشىندە ءبىر رەتتىك تولەممەن تولەنەدى”، – دەلىنگەن كەلىسىم جوباسىندا.
