Biz álemdi beıbitsúıgishtigimizben moıyndattyq, endi osyny yntymaqpen ustap turýymyz kerek!

Bul meniń osydan onshaqty jyl buryn jazǵan sózim edi. Búginde bul sózimniń ózektiligi artpasa, kemigen joq. Qazir álemde senim azaıyp, qaqtyǵystar kóbeıip, beıbitshilik úni estilmeı bara jatqan zamanda Qazaqstan turaqtylyq pen kelisimniń úlgisin kórsetip otyr. Bizdegi etnosaralyq jáne dinaralyq kelisim eshqandaı qur uran emes, shynaıy memlekettik saıasat pen kúndelikti mádenıettiń ajyramas bóligi bolýǵa tıis.

Al keshe ǵana Almatyǵa at basyn tiregen BUU Bas hatshysy Antonıý Gýterrısh elimizdiń ıadrolyq qarýdan óz erkimen bas tartýyn erekshe atap ótti. Bul qadam Qazaqstandy jahan aldynda beıbitsúıgish el retinde tanytyp, ulttyq biregeıligimizdiń bir bóligine aınaldy. Manaǵy meniń sózim esińizde bolar?

«Qazaqstan - parasattyń úni, ol qaqtyǵystar dańǵazasy jıi tunshyqtyryp jatqan álemde erekshe estiledi», - dedi Bas hatshy.

Búgingi tańda elimiz senimdi seriktes ári kelissózderge arnalǵan dıalog alańy retinde baǵalanyp otyr. Bul jetistik tek sózben emes, ispen dáleldendi.

Sondyqtan da BUU Bas hatshysy arnaıy kelip, Prezıdent Qasym-Jomart Toqaevpen kezdesti. Bul - Qazaqstanǵa degen qurmet pen senimniń belgisi. Al senimniń halyqaralyq saıasattaǵy, tipti adamzat arasyndaǵy eń tapshy dúnıege aınalǵan dáýirinde mundaı mártebe asa qundy.

Qazaqstannyń syrtqy saıasattaǵy sol senimi nyǵaıa bersin degennen basqa aıtar joq!