Qazaqstan World Happiness Report 2025 reitinginde 33-orynǵa turaqtap, Frantsiiany (35-oryn) jáne Singapýrdy (36-oryn) artta qaldyrdy. Postkeńestik elder arasynda respýblika óz pozitsiiasyn nyq ustap otyr. Bir jyl ishinde kórsetkish +0.962-ge ósip, bul – top-40 ishindegijoǵary nátije kórsetti, dep habarlaidy Dalanews.kz.
Baqyt qalai esepteledi?
Reiting alty negizgi faktor negizinde qurastyrylady:
- jan basyna shaqqandaǵy ishki jalpy ónim (JIÓ),
- ómir súrý uzaqtyǵy,
- áleýmettik qoldaý,
- tańdaý erkindigi,
- jomarttyq deńgeii,
- sybailas jemqorlyq deńgeii.
Árbir turǵyn óz ómirin 0-den 10-ǵa deiingi shkala boiynsha baǵalaidy. Qorytyndy nátije – keiingi úsh jyldyń (2022-2024) ortasha kórsetkishi.
Kósh basynda kimder tur?
Finliandiia segizinshi jyl qatarynan birinshi oryndy ielenip keledi. Odan keiin Islandiia men Daniia ornalasqan. Al alǵashqy bestikke kútpegen jerden Kosta-Rika (4-oryn) endi. Bul el Shvetsiia, Norvegiia jáne Niderlandyny basyp ozdy.
Zertteýshilerdiń aitýynsha, Latyn Amerikasy elderi ekonomikalyq kórsetkishterine qaramastan ómir sapasyn joǵary baǵalaidy. Bul qubylys ǵylymda «latynamerikalyq baqyt paradoksy» dep atalady.
Izrail jalǵasyp jatqan qaqtyǵysqa qaramastan 8-orynda tur. Al reitingtiń sońǵy, 147-ornynda – Aýǵanstan.
Qazaqstannyń ereksheligi nede?
Qazaqstan senim men ózara kómek kórsetý kórsetkishteri boiynsha joǵary nátijege qol jetkizdi. Biylǵy esepte osy faktorlarǵa erekshe mán berilgen.
El:
joǵalǵan ámiiandy kórshige qaitarý yqtimaldyǵy boiynsha – 30-orynda,
beitanys adamǵa qaitarý boiynsha – 42-orynda.
Aita keteiik, Frantsiia men Singapýr JIÓ deńgeii joǵary bolǵanyna qaramastan, bul kórsetkishter boiynsha Qazaqstannan tómen nátije kórsetti.
Buǵan deiin Qazaqstan satyp alý qabiletiniń pariteti boiynsha álemdegi eń iri 40 ekonomikanyń qataryna engeni habarlanǵan edi.
