Qazaqstan 2026 jyldan bastap Germaniiaǵa eksporttalatyn munai kólemin ulǵaitýǵa nietti. GFR-ǵa ai saiyn 130 tonnaǵa deiin shikizat jóneltý josparlanyp otyr, dep habarlaidy Dalanews.kz.
Bul týraly "QazMunaiGaz" UK AQ (QMG) Basqarma tóraǵasy Ashat Hasenovtyń Rosneft Deutschland GmbH bas direktory Iohanes Bremermen kezdesýi barysynda málim boldy.
Kelissózder barysynda Qazaqstan munaiyn Germaniiaǵa tasymaldaý máseleleri talqylandy. Taraptar ózara tiimdi seriktestikti keńeitýge múddeli ekenin bildirdi.
"Kezdesý qorytyndysy boiynsha Qazaqstan munaiyn Germaniiaǵa jetkizý jónindegi qoldanystaǵy kelisimshart 2026 jyldyń sońyna deiin uzartyldy (Qarashyǵanaq Petroliým Opereiting B.V. resýrsynan). Kelisimde munai jetkizý kólemin aiyna 100 myń tonnadan 130 myń tonnaǵa deiin ulǵaitý kózdelgen", delinedi ulttyq kompaniia habarlamasynda.
Sonymen qatar 2024 jyly QMG Qashaǵan B.V. resýrsynan, al 2025 jyly "Teńizshevroil" JShS resýrsynan da munai jóneltile bastaǵanyn aita ketken jón.
2025 jyldyń toǵyz aiynda Shvedt munai óńdeý zaýytyna eksporttalǵan Qazaqstan munaiynyń kólemi shamamen 1,5 mln tonnany qurady.
Aita ketsek, 2025 jyly 2 qazanda Memleket basshysy Qasym-Jomart Toqaev OPEK-tiń bas hatshysy Haitam ál-Gaisty qabyldap, taraptar álemdik munai naryǵynyń qazirgi jaǵdaiy men yntymaqtastyqtyń ózekti máselelerin talqylaǵan bolatyn. Prezident Qazaqstannyń ulttyq múddeni qorǵaýǵa basymdyq bere otyryp, munai óndirý kólemin birtindep ulǵaitý jónindegi OPEK+ sheshimin qoldaitynyn jetkizgen.
