Áleýmettik jelide tanymal zańger Erjan Esimhanovtyń qazaq tilinde sóileitinderge qatysty jazbasy qyzý talqyǵa túsip jatyr. Threads-tegi jazbadan keiin qalyń kópshilik ashyq pikir bildirip, narazylyǵyn kórsetti, – dep habarlaidy Dalanews.kz.
Daýdyń basy qaidan shyqty?
Jelidegi myna jazbadan keiin daý shyqty:
Zańger kóne tilderdegi mátinderdi qalpyna keltirip, erekshe kontent jasaityn Arum Natzorkhang esimdi bloger týraly aita kelip, sóz arasynda "bul qazaqshasóileshnikterge qaidan jetsin?" degendei mysqyldaǵan.
Halyqtyń ashyq reaktsiiasy
Jeli qoldanýshylary qazaq tili sóz bolǵan bul daýly jazbadan keiin únsiz qalmaǵan.
"Ana tilin qurmetteýge shaqyrǵandardy "Qazaqshasóileshniki" dep kemitetin qazaq bloger bar eken. Angliiada turmasa da aǵylshyn tilin sanaýly ýaqytta úirenipti. Biraq Qazaqstanda týyp-ósse de 30 jylda ana tilin meńgermegenine tań qalam", - dep jazdy jýrnalist Ǵalymjan Qaramanuly.
"Qazaqshasóileshniki" degen termindi bolyppyz. Bálkim qazaqsha sóileýdi talap etetinder "rýsskoiazychnaia sreda" ókilderine yńǵaisyzdyq týdyryp júrgen bolarmyz", - dep jazdy tanymal prodiýser Aisáýle Ábilda.
"Qazaqsha sóile degennen sonsha shoshyp, ony bir qubyjyq qylyp kórsetesiz", "Qansha aqtalsańyz da "qazaqshasóileshniki" dep kemsitkenińiz durys bolmapty", "Qazaqty kemsitpe, qazaq bala", - dedi ózge de jeli qoldanýshylary.
Zańgerdiń jaýaby
Halyq tarapynan aitylǵan syn-pikirlerden keiin zańgerdiń ózi jaýap berdi. Onyń sózinshe, buǵan deiin aitqan tirkesi sátsiz bolǵan.
"Biraq men bir nárseni aitqym kelgen. Qazaq tilin nasihattaýdyń eki joly bar: biri – sabyrmen, dostyqpen úirenýge shaqyrý, kómektesý. Ekinshisi – til bilmeitinderdi qorlaý, aiqailap "Qazaqsha sóile!" deý. Men sońǵysyna qarsy boldym", – dedi ol.
Al jelide jariialaǵan ekinshi jazbasynda Erjan Esimhanov bul daýdan keiin naqty nátije shyǵarǵysy keletinin aityp, birneshe usynys jasaǵan.
Birinshiden, ol jyl sońyna deiin qazaq tilin jetik meńgerip, alǵashqy jazbasyn taza qazaq tilinde jazatynyn aitty. Sondai-aq, qazaqsha sóileitin beinejazba jariialaýǵa ýáde berdi. Ekinshiden, ol repetitorlar men paidaly qazaqsha kýrstar, qosymshalar nemese podkastar týraly usynystardy pikirge qaldyrýdy surady. Bul tek ózine emes, basqa da til úirengisi keletinderge paidaly bolatynyn málimdedi.
Buǵan deiingi daý
Keiingi kezde qoǵamda qazaq tiliniń mártebesine qatysty kez kelgen taqyryp qyzý talqyǵa túsedi. Halyq jýyrda ǵana bolǵan Magnum daýyn da umytqan joq.
Buǵan deiin áleýmettik jelilerde Magnum sýpermarketter jelisiniń kýreri jumystan shyǵarylýy úlken talqyǵa tústi. Bul jaǵdai kýrer klientten qazaq tilinde sóileýin suraýynan keiin boldy.
Klient Asylhan esimdi azamattyń aitýynsha, ol Magnum-nan azyq-túlikke tapsyrys bergen kezde kýrer odan qazaqsha sóileýdi talap etken. Keiin bul oqiǵa áleýmettik jelide jariialanyp, nátijesinde kýrer jumystan qýylǵan bolatyn. Alaida keiinirek kýrer men tapsyrys berýshiniń videosy tarady. Olar ortaq kelisimge kelgenin málimdedi.
