الەۋمەتتىك جەلىدە تانىمال زاڭگەر ەرجان ەسىمحانوۆتىڭ قازاق تىلىندە سويلەيتىندەرگە قاتىستى جازباسى قىزۋ تالقىعا ءتۇسىپ جاتىر. Threads-تەگى جازبادان كەيىن قالىڭ كوپشىلىك اشىق پىكىر ءبىلدىرىپ، نارازىلىعىن كورسەتتى، – دەپ حابارلايدى Dalanews.kz.

داۋدىڭ باسى قايدان شىقتى؟

جەلىدەگى مىنا جازبادان كەيىن داۋ شىقتى:

زاڭگەر كونە تىلدەردەگى ماتىندەردى قالپىنا كەلتىرىپ، ەرەكشە كونتەنت جاسايتىن Arum Natzorkhang ەسىمدى بلوگەر تۋرالى ايتا كەلىپ، ءسوز اراسىندا "بۇل قازاقشاسويلەشنيكتەرگە قايدان جەتسىن؟" دەگەندەي مىسقىلداعان.

حالىقتىڭ اشىق رەاكسياسى

جەلى قولدانۋشىلارى قازاق ءتىلى ءسوز بولعان بۇل داۋلى جازبادان كەيىن ءۇنسىز قالماعان.

"انا ءتىلىن قۇرمەتتەۋگە شاقىرعانداردى "قازاقشاسويلەشنيكي" دەپ كەمىتەتىن قازاق بلوگەر بار ەكەن. انگليادا تۇرماسا دا اعىلشىن ءتىلىن ساناۋلى ۋاقىتتا ۇيرەنىپتى. ءبىراق قازاقستاندا تۋىپ-وسسە دە 30 جىلدا انا ءتىلىن مەڭگەرمەگەنىنە تاڭ قالام"، - دەپ جازدى جۋرناليست عالىمجان قارامان ۇلى.

"قازاقشاسويلەشنيكي" دەگەن تەرميندى بولىپپىز. بالكىم قازاقشا سويلەۋدى تالاپ ەتەتىندەر "رۋسسكويازىچنايا سرەدا" وكىلدەرىنە ىڭعايسىزدىق تۋدىرىپ جۇرگەن بولارمىز"، - دەپ جازدى تانىمال پروديۋسەر ايساۋلە ءابىلدا.

"قازاقشا سويلە دەگەننەن سونشا شوشىپ، ونى ءبىر قۇبىجىق قىلىپ كورسەتەسىز"، "قانشا اقتالساڭىز دا "قازاقشاسويلەشنيكي" دەپ كەمسىتكەنىڭىز دۇرىس بولماپتى"، "قازاقتى كەمسىتپە، قازاق بالا"، - دەدى وزگە دە جەلى قولدانۋشىلارى.

زاڭگەردىڭ جاۋابى

حالىق تاراپىنان ايتىلعان سىن-پىكىرلەردەن كەيىن زاڭگەردىڭ ءوزى جاۋاپ بەردى. ونىڭ سوزىنشە، بۇعان دەيىن ايتقان تىركەسى ءساتسىز بولعان.

"ءبىراق مەن ءبىر نارسەنى ايتقىم كەلگەن. قازاق ءتىلىن ناسيحاتتاۋدىڭ ەكى جولى بار: ءبىرى – سابىرمەن، دوستىقپەن ۇيرەنۋگە شاقىرۋ، كومەكتەسۋ. ەكىنشىسى – ءتىل بىلمەيتىندەردى قورلاۋ، ايقايلاپ "قازاقشا سويلە!" دەۋ. مەن سوڭعىسىنا قارسى بولدىم"، – دەدى ول.

ال جەلىدە جاريالاعان ەكىنشى جازباسىندا ەرجان ەسىمحانوۆ بۇل داۋدان كەيىن ناقتى ناتيجە شىعارعىسى كەلەتىنىن ايتىپ، بىرنەشە ۇسىنىس جاساعان.

بىرىنشىدەن، ول جىل سوڭىنا دەيىن قازاق ءتىلىن جەتىك مەڭگەرىپ، العاشقى جازباسىن تازا قازاق تىلىندە جازاتىنىن ايتتى. سونداي-اق، قازاقشا سويلەيتىن بەينەجازبا جاريالاۋعا ۋادە بەردى. ەكىنشىدەن، ول رەپەتيتورلار مەن پايدالى قازاقشا كۋرستار، قوسىمشالار نەمەسە پودكاستار تۋرالى ۇسىنىستاردى پىكىرگە قالدىرۋدى سۇرادى. بۇل تەك وزىنە ەمەس، باسقا دا ءتىل ۇيرەنگىسى كەلەتىندەرگە پايدالى بولاتىنىن مالىمدەدى.

بۇعان دەيىنگى داۋ

كەيىنگى كەزدە قوعامدا قازاق ءتىلىنىڭ مارتەبەسىنە قاتىستى كەز كەلگەن تاقىرىپ قىزۋ تالقىعا تۇسەدى. حالىق جۋىردا عانا بولعان Magnum داۋىن دا ۇمىتقان جوق.

بۇعان دەيىن الەۋمەتتىك جەلىلەردە Magnum سۋپەرماركەتتەر جەلىسىنىڭ كۋرەرى جۇمىستان شىعارىلۋى ۇلكەن تالقىعا ءتۇستى. بۇل جاعداي كۋرەر كليەنتتەن قازاق تىلىندە سويلەۋىن سۇراۋىنان كەيىن بولدى.

كليەنت اسىلحان ەسىمدى ازاماتتىڭ ايتۋىنشا، ول Magnum-نان ازىق-تۇلىككە تاپسىرىس بەرگەن كەزدە كۋرەر ودان قازاقشا سويلەۋدى تالاپ ەتكەن. كەيىن بۇل وقيعا الەۋمەتتىك جەلىدە جاريالانىپ، ناتيجەسىندە كۋرەر جۇمىستان قۋىلعان بولاتىن. الايدا كەيىنىرەك كۋرەر مەن تاپسىرىس بەرۋشىنىڭ ۆيدەوسى تارادى. ولار ورتاق كەلىسىمگە كەلگەنىن مالىمدەدى.