Jezqazǵanda Metallýrg kúnine arnalǵan merekelik is-sharalardyń basty oqiǵasy «Qazaqmys» Toby uiymdastyrǵan Metallurg Fest festivali boldy. Osy keshte qalanyń ortalyq alańy merekelik dýmanǵa ulasyp, Ulytaý oblysynyń myńdaǵan turǵyny men qonaǵynyń basyn qosty, dep habarlaidy dalanews.kz.
Metallurg Fest festivalin ótkizý kompaniianyń igi dástúrine ainaldy. Mereke jyl saiyn Jezqazǵannyń, Ulytaý óńiriniń jáne tutas otandyq metallýrgiia salasynyń damýyna zor úles qosyp kele jatqan metallýrgter men olardyń otbasyna degen qurmet pen alǵystyń belgisi retinde uiymdastyrylady.
Dástúrge sai festival aýqymdy otbasylyq baǵdarlamadan bastaldy. Balalar úshin arnaiy oiyn jáne shyǵarmashylyq alańdar, akvagrim aimaqtary men art-keńistikter ázirlendi. Animatorlar men alyp qýyrshaqtar kishkentai qonaqtarǵa shattyq syilap, merekeniń sánin keltirdi. Balalar himiialyq shoý men sabyn kópirshikteri qoiylymyn qyzyǵa tamashalap, tosynsyilarǵa toly merekelik piniatany zor qýanyshpen qarsy aldy.
Kontserttik baǵdarlamany belgili otandyq júrgizýshiler Erkebulan Myrzabek pen Marat Oralǵazin ashty. Olar metallýrgterdi kásibi merekesimen quttyqtap, kórermenderge erekshe merekelik kóńil-kúi syilady.
Keshtiń mýzykalyq baǵdarlamasy Timur Teams bi ujymynyń áserli shoýymen bastaldy. Odan keiin sahna tórine shyqqan IL’HAN zamanaýi otandyq estrada tyńdarmandaryn ónerimen tánti etti.
Qazaqstannyń halyq ártisi Bolat Qusaiynov pen ánshi BAYANSULU merekelik keshke erekshe jylýlyq syilady. Olardyń ónerin ártúrli býyn ókilderi ystyq yqylaspen qabyldady.
Keshtiń eń jarqyn sátteriniń biri ataqty «Ialla» tobynyń óner kórsetýi boldy. Toptyń kópshilikke tanymal ánderi festival qonaqtarynyń birneshe býynyn biriktirdi. Kórermender búginde klassikaǵa ainalǵan tanys áýenderge qosylyp birge án shyrqady.
Sadraddin-niń sahnaǵa shyǵýy merekelik keshke erekshe serpin berdi. Alǵashqy minýttardan-aq alań ashyq aspan astyndaǵy úlken bi alańyna ainaldy. Kórermender súiikti ánderine qosylyp, birge bilep, óner iesin zor qoshemetpen qarsy aldy.
Metallurg Fest festivaliniń qorytyndy bóliginde Madiiar Toiboldy jetekshilik etetin Ne Prosto Orchestra óner kórsetti. Almatydan kelgen táýelsiz simfoniialyq orkestr otandyq estrada shyǵarmalaryn, álemdik tanymal týyndylardy, retro-kompozitsiialar men belgili kinofilmderden alynǵan áýenderdi biriktirgen erekshe mýzykalyq baǵdarlama usyndy. Simfoniialyq áýen merekege erekshe saltanat syilap, kontserttik baǵdarlamanyń qorytyndy núktesin qoidy.
Keshtiń sharyqtaý shegi – Jezqazǵan aspanyn san alýan túske bólegen áserli merekelik otshashý boldy. Kontsert aiaqtalǵannan keiin de qala turǵyndary men qonaqtary alańnan birden tarqamai, estelik sýretke túsip, alǵan áserimen bólisip, bir-birin Metallýrg kúnimen quttyqtady.
