Jezqazǵanda kompanıa basshylyǵy men óńirdegi kásiporyndardyń jumyskerleri arasynda ótken kezdesýde ónerkásiptiń el damýyna qosatyn úlesi men jańa ınstıtýsıonaldyq ózgerister kezeńindegi Qazaqmystyń mindeti talqylandy, dep habarlaıdy Dalanews.kz.
Basqarma tóraǵasy Rýslan Óskenáli óz sózinde taý-ken metalýrgıa salasynyń Qazaqstan ekonomıkasynan alatyn ornyn atap ótip, tártip pen jaýapkershilikten quralǵan júıeli jumys kompanıanyń negizgi ustanymy ekenin jetkizdi. Sondaı-aq ol munda árbir úderis muqıat tekserilip, árbir talap qaýipsizdik pen sapa standartyna negizdeletinin aıtty.
Kezdesýde Qazaqstan Respýblıkasynyń jańa Konstıtýsıasynyń jobasy jáne onyń el men óńirlerdiń turaqty damýyna tıgizetin áseri talqylandy.
Rýslan Óskenáli «Qazaqmys» korporasıasy memlekettiń quqyqtyq negizin nyǵaıtýǵa, basqarý qaǵıdattarynyń ashyqtyǵyn arttyrýǵa, sondaı-aq memleket, bıznes jáne qoǵam arasyndaǵy ózara jaýapkershilik teńgerimin saqtaýǵa baǵyttalǵan konstıtýsıalyq reformany qoldaıtynyn atap ótti.
«Biz óńirdegi eń iri ónerkásiptik kompanıa retinde turaqtylyqqa, retteýdiń aıqyndyǵyna jáne reformalardyń dáıektiligine múddelimiz. Bıznes úshin aldyn ala boljam jasaýǵa bolatyn, zańǵa negizdelgen jáne barlyǵyna birdeı jaǵdaı jasalǵan orta mańyzdy. Al qyzmetkerlerge áleýmettik kepildikter, qaýipsizdik jáne erteńgi kúnge degen senim qajet», – dedi ol.
Onyń sózinshe, memlekettiń turaqtylyǵy túsinikti ári ornyqty erejelerge, uzaq merzimdi damý josparyna jáne óńirlerdi júıeli qoldaýǵa negizdeledi. Osy oraıda Rýslan Óskenáli Qazaqstan Respýblıkasynyń Prezıdenti Qasym-Jomart Toqaevtyń Úkimettiń keńeıtilgen otyrysynda óńirlerge, onyń ishinde Ulytaý oblysyna erekshe qoldaý kórsetý qajettigi týraly sózin eske saldy. Praktıkalyq turǵydan alǵanda bul «Qazaqmys» korporasıasynyń ózine qatysy bar óńirlerdi damytý, ınfraqurylym men bilimge ınvestısıa salý, sondaı-aq turaqty jumys oryndaryn ashý jónindegi júıeli jumysynyń jalǵasy bolmaq.
Basqarma tóraǵasy bıznes pen qyzmetkerler úshin turaqty ári ashyq iskerlik ortanyń mańyzy erekshe ekenine toqtaldy.
Kompanıa Prezıdent kórsetken baǵytty qoldaıtynyn jáne ózine qatysty kásiporyndardyń turaqty jumysyn qamtamasyz etý, óńirlerdi damytý sonda-aq el ekonomıkasyn nyǵaıtý mindetin tıisinshe oryndap jatqanyn málimdedi.
Kompanıa basshylyǵynyń ustanymyna óndirýshilerdiń aǵa býyn ókilderi de qoldaý bildirdi.
«Biz ómir boıy óndiriste júrdik. Sol tájirıbeden túıgen bir shyndyq bar: eldiń naǵyz tiregi – eńbek adamy. Zań aıqyn, tártip berik, jaýapkershilik ortaq bolsa ǵana óndiris te, memleket te alǵa basady. Búgin qabyldanatyn sheshim – erteńgi urpaqtyń ómirine áser etedi. Sondyqtan árqaısymyz el bolashaǵyna beıjaı qaramaýymyz kerek», – dedi «Qazaqmys korporasıasy» JSHS Ardagerler keńesiniń tóraǵasy Tólegen Búkirov.
Ardager Negizgi zańnyń normalary eńbek adamynyń quqyǵyn qorǵaýda jáne turaqtylyq pen erteńgi kúnge degen senimdi qalyptastyrýda erekshe mańyzǵa ıe ekenin atap ótti.
Sóz sońynda Basqarma tóraǵasy qyzmetkerlerge adal eńbegi jáne kompanıa men óńirdiń damýyna qosyp jatqan úlesi úshin alǵys aıtyp, bolashaqtyń berik bolýy tártipke, júıeli jumysqa jáne memlekettik ınstıtýttarǵa degen senimge negizdeletinin aıtty.
