جەزقازعاندا كومپانيا باسشىلىعى مەن وڭىردەگى كاسىپورىنداردىڭ جۇمىسكەرلەرى اراسىندا وتكەن كەزدەسۋدە ونەركاسىپتىڭ ەل دامۋىنا قوساتىن ۇلەسى مەن جاڭا ينستيتۋسيونالدىق وزگەرىستەر كەزەڭىندەگى قازاقمىستىڭ مىندەتى تالقىلاندى، دەپ حابارلايدى Dalanews.kz.
باسقارما ءتوراعاسى رۋسلان وسكەنالى ءوز سوزىندە تاۋ-كەن مەتاللۋرگيا سالاسىنىڭ قازاقستان ەكونوميكاسىنان الاتىن ورنىن اتاپ ءوتىپ، ءتارتىپ پەن جاۋاپكەرشىلىكتەن قۇرالعان جۇيەلى جۇمىس كومپانيانىڭ نەگىزگى ۇستانىمى ەكەنىن جەتكىزدى. سونداي-اق ول مۇندا ءاربىر ۇدەرىس مۇقيات تەكسەرىلىپ، ءاربىر تالاپ قاۋىپسىزدىك پەن ساپا ستاندارتىنا نەگىزدەلەتىنىن ايتتى.
كەزدەسۋدە قازاقستان رەسپۋبليكاسىنىڭ جاڭا كونستيتۋسياسىنىڭ جوباسى جانە ونىڭ ەل مەن وڭىرلەردىڭ تۇراقتى دامۋىنا تيگىزەتىن اسەرى تالقىلاندى.
رۋسلان وسكەنالى «قازاقمىس» كورپوراسياسى مەملەكەتتىڭ قۇقىقتىق نەگىزىن نىعايتۋعا، باسقارۋ قاعيداتتارىنىڭ اشىقتىعىن ارتتىرۋعا، سونداي-اق مەملەكەت، بيزنەس جانە قوعام اراسىنداعى ءوزارا جاۋاپكەرشىلىك تەڭگەرىمىن ساقتاۋعا باعىتتالعان كونستيتۋسيالىق رەفورمانى قولدايتىنىن اتاپ ءوتتى.
«ءبىز وڭىردەگى ەڭ ءىرى ونەركاسىپتىك كومپانيا رەتىندە تۇراقتىلىققا، رەتتەۋدىڭ ايقىندىعىنا جانە رەفورمالاردىڭ دايەكتىلىگىنە مۇددەلىمىز. بيزنەس ءۇشىن الدىن الا بولجام جاساۋعا بولاتىن، زاڭعا نەگىزدەلگەن جانە بارلىعىنا بىردەي جاعداي جاسالعان ورتا ماڭىزدى. ال قىزمەتكەرلەرگە الەۋمەتتىك كەپىلدىكتەر، قاۋىپسىزدىك جانە ەرتەڭگى كۇنگە دەگەن سەنىم قاجەت»، – دەدى ول.
ونىڭ سوزىنشە، مەملەكەتتىڭ تۇراقتىلىعى تۇسىنىكتى ءارى ورنىقتى ەرەجەلەرگە، ۇزاق مەرزىمدى دامۋ جوسپارىنا جانە وڭىرلەردى جۇيەلى قولداۋعا نەگىزدەلەدى. وسى ورايدا رۋسلان وسكەنالى قازاقستان رەسپۋبليكاسىنىڭ پرەزيدەنتى قاسىم-جومارت توقايەۆتىڭ ۇكىمەتتىڭ كەڭەيتىلگەن وتىرىسىندا وڭىرلەرگە، ونىڭ ىشىندە ۇلىتاۋ وبلىسىنا ەرەكشە قولداۋ كورسەتۋ قاجەتتىگى تۋرالى ءسوزىن ەسكە سالدى. پراكتيكالىق تۇرعىدان العاندا بۇل «قازاقمىس» كورپوراسياسىنىڭ وزىنە قاتىسى بار وڭىرلەردى دامىتۋ، ينفراقۇرىلىم مەن بىلىمگە ينۆەستيسيا سالۋ، سونداي-اق تۇراقتى جۇمىس ورىندارىن اشۋ جونىندەگى جۇيەلى جۇمىسىنىڭ جالعاسى بولماق.
باسقارما ءتوراعاسى بيزنەس پەن قىزمەتكەرلەر ءۇشىن تۇراقتى ءارى اشىق ىسكەرلىك ورتانىڭ ماڭىزى ەرەكشە ەكەنىنە توقتالدى.
كومپانيا پرەزيدەنت كورسەتكەن باعىتتى قولدايتىنىن جانە وزىنە قاتىستى كاسىپورىنداردىڭ تۇراقتى جۇمىسىن قامتاماسىز ەتۋ، وڭىرلەردى دامىتۋ سوندا-اق ەل ەكونوميكاسىن نىعايتۋ مىندەتىن تيىسىنشە ورىنداپ جاتقانىن مالىمدەدى.
كومپانيا باسشىلىعىنىڭ ۇستانىمىنا وندىرۋشىلەردىڭ اعا بۋىن وكىلدەرى دە قولداۋ ءبىلدىردى.
«ءبىز ءومىر بويى وندىرىستە جۇردىك. سول تاجىريبەدەن تۇيگەن ءبىر شىندىق بار: ەلدىڭ ناعىز تىرەگى – ەڭبەك ادامى. زاڭ ايقىن، ءتارتىپ بەرىك، جاۋاپكەرشىلىك ورتاق بولسا عانا ءوندىرىس تە، مەملەكەت تە العا باسادى. بۇگىن قابىلداناتىن شەشىم – ەرتەڭگى ۇرپاقتىڭ ومىرىنە اسەر ەتەدى. سوندىقتان ءارقايسىمىز ەل بولاشاعىنا بەيجاي قاراماۋىمىز كەرەك»، – دەدى «قازاقمىس كورپوراسياسى» ج ش س ارداگەرلەر كەڭەسىنىڭ ءتوراعاسى تولەگەن بۇكىروۆ.
ارداگەر نەگىزگى زاڭنىڭ نورمالارى ەڭبەك ادامىنىڭ قۇقىعىن قورعاۋدا جانە تۇراقتىلىق پەن ەرتەڭگى كۇنگە دەگەن سەنىمدى قالىپتاستىرۋدا ەرەكشە ماڭىزعا يە ەكەنىن اتاپ ءوتتى.
ءسوز سوڭىندا باسقارما ءتوراعاسى قىزمەتكەرلەرگە ادال ەڭبەگى جانە كومپانيا مەن ءوڭىردىڭ دامۋىنا قوسىپ جاتقان ۇلەسى ءۇشىن العىس ايتىپ، بولاشاقتىڭ بەرىك بولۋى تارتىپكە، جۇيەلى جۇمىسقا جانە مەملەكەتتىك ينستيتۋتتارعا دەگەن سەنىمگە نەگىزدەلەتىنىن ايتتى.
