Qaraǵandy oblysynda «Qazaqmys» korporasıasynyń qatysýymen áleýmettik jáne ónerkásiptik áriptestiktiń jańa kezeńi bastalady. 2026 jylǵy 27 aqpanda Qaraǵandyda jalpy somasy 6 mlrd teńgeden asatyn jobalardy júzege asyrýdy kózdeıtin yntymaqtastyq týraly memorandýmǵa qol qoıyldy, dep habarlaıdy Dalanews.kz.
Kelisim aıasynda densaýlyq saqtaý, bilim berý, sportty damytý jáne eldi mekenderdi abattandyrý basym baǵyt bolyp aıqyndaldy. Bul mindet naqty nysandar arqyly júzege asyrylady. Balqash qalasynda jańa balabaqsha salý jáne aýmaǵyn abattandyra otyryp sý sporty túrleriniń bazasyn ashý josparlanýda.
2026 jyly Sheshenqara, Baımyrza aýyldarynda jáne Aqtaý kentinde birqatar áleýmettik joba júzege asyrylady. Atalǵan eldi mekenderde dárigerlik ambýlatorıa, sport kesheni jáne órt sóndirý deposyn salý josparlanǵan. Bul medısınalyq kómektiń qoljetimdiligin arttyrýǵa, sportpen shuǵyldanýǵa qolaıly jaǵdaı jasaýǵa jáne órt qaýipsizdigin kúsheıtýge múmkindik beredi.
Eki jylǵa eseptelgen qujat óńir men iri bıznes arasyndaǵy ózara is-qımyldyń jańa kezeńin aıqyndaıdy. Onda óndiriske ǵana emes, sonymen qatar áleýmettik áriptestikke de basymdyq beriledi.
«Bul memorandým tek óndiristik máselelerge ǵana qatysty emes. Onda áleýmettik jaýapkershilik, kásiporyndar ornalasqan eldi mekenderdiń turǵyndaryn qoldaý jáne áleýmettik nysan salý máseleleri qamtylǵan. Biz óz tarapymyzdan jan-jaqty qoldaý kórsetemiz. Búgin qol qoıylǵan memorandým júıeli túrde júzege asyrylyp, josparlanǵan jobalardyń basym bóligi kelisim merzimi aıaqtalǵanǵa deıin oryndalady dep senemiz», – dedi Ermaǵanbet Bólekpaev.
Sonymen qatar Qaraǵandy oblysynyń Kásipkerlik jáne ónerkásip basqarmasymen jáne «Saryarqa» ÁKK» AQ-men ónerkásiptik yntymaqtastyq týraly memorandýmǵa qol qoıyldy. Qujat jergilikti óndiristi damytýǵa, shaǵyn jáne orta bıznesti qoldaýǵa baǵyttalǵan. Jańa óndiristi ornalastyrý úshin jer telimin berý jáne sapa men naryq talabyn saqtaı otyryp, otandyq óndirýshilermen uzaq merzimdi ofteık-kelisimshart jasaý múmkindigi qarastyrylýda.
Ermaǵanbet Bólekpaev óńirde júıequraýshy kásiporyndarmen ózara is-qımyldyń oń tájirıbesi qalyptasqanyn jáne ony keńeıtip, aýqymyn arttyrýǵa bolatynyn atap ótti.
«Bizde tıimdi seriktestiktiń naqty mysaldary bar. Olardy kompanıa jumys isteıtin basqa óńirlerde de qoldanýǵa bolady», – dedi óńir basshysy.
Óz kezeginde «Qazaqmys korporasıasy» JSHS Basqarma tóraǵasy Rýslan Óskenáli óńirdiń kompanıa úshin strategıalyq mańyzyna jáne qol qoıylǵan kelisimderdiń naqty nátıjege baǵyttalǵanyna nazar aýdardy.
«Qaraǵandy oblysy – biz úshin strategıalyq turǵydan asa mańyzdy óńir. Munda kompanıanyń negizgi óndiristik aktıvteri – Qaraǵaıly, Nurqazǵan, Balqash, Qaraǵandy quıý-mashına jasaý zaýyty (QQMJZ) shoǵyrlanǵan. Dál osy sebepti óńirde jumysymyzdy bastaǵan sátten bastap biz júıeli áleýmettik jáne ınfraqurylymdyq qoldaýǵa basymdyq berdik. Búgin qol qoıylǵan memorandým – jaı ǵana formaldylyq emes, aýmaqty damytýdyń naqty quraly. Osy baǵdarlamalardy iske asyrý óńirdiń áleýmettik-ekonomıkalyq damýyna naqty úles qosyp, kózge kórinetin ári uzaq merzimdi nátıje beredi dep senemin», – dep atap ótti «Qazaqmys korporasıasy» JSHS Basqarma tóraǵasy Rýslan Óskenáli.
Qol qoıylǵan memorandýmdardy júzege asyrý óńirdiń áleýmettik ınfraqurylymyn nyǵaıtýǵa, qosymsha jumys oryndaryn ashýǵa jáne jergilikti bıznestiń damýyn qoldaýǵa múmkindik beredi. Qazaqmys úshin ózine qatysy bar aımaqtardy damytý – óńirdiń órkendeýine jáne halyqtyń ómir súrý sapasyn arttyrýǵa baǵyttalǵan júıeli jumys bolyp tabylady.
