قاراعاندى وبلىسىندا «قازاقمىس» كورپوراسياسىنىڭ قاتىسۋىمەن الەۋمەتتىك جانە ونەركاسىپتىك ارىپتەستىكتىڭ جاڭا كەزەڭى باستالادى. 2026 جىلعى 27 اقپاندا قاراعاندىدا جالپى سوماسى 6 ملرد تەڭگەدەن اساتىن جوبالاردى جۇزەگە اسىرۋدى كوزدەيتىن ىنتىماقتاستىق تۋرالى مەموراندۋمعا قول قويىلدى، دەپ حابارلايدى Dalanews.kz.

كەلىسىم اياسىندا دەنساۋلىق ساقتاۋ، ءبىلىم بەرۋ، سپورتتى دامىتۋ جانە ەلدى مەكەندەردى اباتتاندىرۋ باسىم باعىت بولىپ ايقىندالدى. بۇل مىندەت ناقتى نىساندار ارقىلى جۇزەگە اسىرىلادى. بالقاش قالاسىندا جاڭا بالاباقشا سالۋ جانە اۋماعىن اباتتاندىرا وتىرىپ سۋ سپورتى تۇرلەرىنىڭ بازاسىن اشۋ جوسپارلانۋدا.

2026 جىلى شەشەنقارا، بايمىرزا اۋىلدارىندا جانە اقتاۋ كەنتىندە ءبىرقاتار الەۋمەتتىك جوبا جۇزەگە اسىرىلادى. اتالعان ەلدى مەكەندەردە دارىگەرلىك امبۋلاتوريا، سپورت كەشەنى جانە ءورت ءسوندىرۋ دەپوسىن سالۋ جوسپارلانعان. بۇل مەديسينالىق كومەكتىڭ قولجەتىمدىلىگىن ارتتىرۋعا، سپورتپەن شۇعىلدانۋعا قولايلى جاعداي جاساۋعا جانە ءورت قاۋىپسىزدىگىن كۇشەيتۋگە مۇمكىندىك بەرەدى.

ەكى جىلعا ەسەپتەلگەن قۇجات ءوڭىر مەن ءىرى بيزنەس اراسىنداعى ءوزارا ءىس-قيمىلدىڭ جاڭا كەزەڭىن ايقىندايدى. وندا وندىرىسكە عانا ەمەس، سونىمەن قاتار الەۋمەتتىك ارىپتەستىككە دە باسىمدىق بەرىلەدى.

«بۇل مەموراندۋم تەك وندىرىستىك ماسەلەلەرگە عانا قاتىستى ەمەس. وندا الەۋمەتتىك جاۋاپكەرشىلىك، كاسىپورىندار ورنالاسقان ەلدى مەكەندەردىڭ تۇرعىندارىن قولداۋ جانە الەۋمەتتىك نىسان سالۋ ماسەلەلەرى قامتىلعان. ءبىز ءوز تاراپىمىزدان جان-جاقتى قولداۋ كورسەتەمىز. بۇگىن قول قويىلعان مەموراندۋم جۇيەلى تۇردە جۇزەگە اسىرىلىپ، جوسپارلانعان جوبالاردىڭ باسىم بولىگى كەلىسىم مەرزىمى اياقتالعانعا دەيىن ورىندالادى دەپ سەنەمىز»، – دەدى ەرماعانبەت بولەكپايەۆ.

سونىمەن قاتار قاراعاندى وبلىسىنىڭ كاسىپكەرلىك جانە ونەركاسىپ باسقارماسىمەن جانە «سارىارقا» اكك» اق-مەن ونەركاسىپتىك ىنتىماقتاستىق تۋرالى مەموراندۋمعا قول قويىلدى. قۇجات جەرگىلىكتى ءوندىرىستى دامىتۋعا، شاعىن جانە ورتا بيزنەستى قولداۋعا باعىتتالعان. جاڭا ءوندىرىستى ورنالاستىرۋ ءۇشىن جەر تەلىمىن بەرۋ جانە ساپا مەن نارىق تالابىن ساقتاي وتىرىپ، وتاندىق وندىرۋشىلەرمەن ۇزاق مەرزىمدى وفتەيك-كەلىسىمشارت جاساۋ مۇمكىندىگى قاراستىرىلۋدا.

ەرماعانبەت بولەكپايەۆ وڭىردە جۇيەقۇراۋشى كاسىپورىندارمەن ءوزارا ءىس-قيمىلدىڭ وڭ تاجىريبەسى قالىپتاسقانىن جانە ونى كەڭەيتىپ، اۋقىمىن ارتتىرۋعا بولاتىنىن اتاپ ءوتتى.

«بىزدە ءتيىمدى سەرىكتەستىكتىڭ ناقتى مىسالدارى بار. ولاردى كومپانيا جۇمىس ىستەيتىن باسقا وڭىرلەردە دە قولدانۋعا بولادى»، – دەدى ءوڭىر باسشىسى.

ءوز كەزەگىندە «قازاقمىس كورپوراسياسى» ج ش س باسقارما ءتوراعاسى رۋسلان وسكەنالى ءوڭىردىڭ كومپانيا ءۇشىن ستراتەگيالىق ماڭىزىنا جانە قول قويىلعان كەلىسىمدەردىڭ ناقتى ناتيجەگە باعىتتالعانىنا نازار اۋداردى.

«قاراعاندى وبلىسى – ءبىز ءۇشىن ستراتەگيالىق تۇرعىدان اسا ماڭىزدى ءوڭىر. مۇندا كومپانيانىڭ نەگىزگى وندىرىستىك اكتيۆتەرى – قاراعايلى، نۇرقازعان، بالقاش، قاراعاندى قۇيۋ-ماشينا جاساۋ زاۋىتى (ققمجز) شوعىرلانعان. ءدال وسى سەبەپتى وڭىردە جۇمىسىمىزدى باستاعان ساتتەن باستاپ ءبىز جۇيەلى الەۋمەتتىك جانە ينفراقۇرىلىمدىق قولداۋعا باسىمدىق بەردىك. بۇگىن قول قويىلعان مەموراندۋم – جاي عانا فورمالدىلىق ەمەس، اۋماقتى دامىتۋدىڭ ناقتى قۇرالى. وسى باعدارلامالاردى ىسكە اسىرۋ ءوڭىردىڭ الەۋمەتتىك-ەكونوميكالىق دامۋىنا ناقتى ۇلەس قوسىپ، كوزگە كورىنەتىن ءارى ۇزاق مەرزىمدى ناتيجە بەرەدى دەپ سەنەمىن»، – دەپ اتاپ ءوتتى «قازاقمىس كورپوراسياسى» ج ش س باسقارما ءتوراعاسى رۋسلان وسكەنالى.

قول قويىلعان مەموراندۋمداردى جۇزەگە اسىرۋ ءوڭىردىڭ الەۋمەتتىك ينفراقۇرىلىمىن نىعايتۋعا، قوسىمشا جۇمىس ورىندارىن اشۋعا جانە جەرگىلىكتى بيزنەستىڭ دامۋىن قولداۋعا مۇمكىندىك بەرەدى. قازاقمىس ءۇشىن وزىنە قاتىسى بار ايماقتاردى دامىتۋ – ءوڭىردىڭ وركەندەۋىنە جانە حالىقتىڭ ءومىر ءسۇرۋ ساپاسىن ارتتىرۋعا باعىتتالعان جۇيەلى جۇمىس بولىپ تابىلادى.