Jambyl oblysynyń Shý aýdanynda «Shatyrkól» apattyq sý aǵyzý kanaly arqyly ótetin kópir qaıta jańartylyp, paıdalanýǵa berildi. Kópir Dinmuhamed Qonaev atyndaǵy aýyldan Birlik aýylyna qaraı baǵyttalǵan temirjol ótkeliniń janynda ornalasqan, dep habarlaıdy Dalanews.kz.
Kópir qurylysynyń apatty jaǵdaıyna baılanysty «Qazaqmys» korporasıasy ony jańǵyrtý týraly bastama kóterdi. Jobanyń negizgi mindeti – kólik jáne temirjol ınfraqurylymy aımaǵynda avtokóliktiń qaýipsiz ári turaqty qozǵalysyn qamtamasyz etý. Jumystyń jalpy quny 360 mln teńgeni qurady. Joba jergilikti atqarýshy organdarmen birlesip júzege asyryldy.
«Biz mundaı nysandarǵa tek óndiristik qajettilik retinde emes, áldeqaıda aýqymdy turǵydan qaraımyz. Kópir aýdan turǵyndary belsendi paıdalanatyn jolda ornalasqan, sondyqtan onyń jaǵdaıyn baǵalaý kezinde basty nazar adamdardyń qaýipsizdigine jáne ınfraqurylymdyq táýekelderdi azaıtýǵa aýdaryldy», – dedi «Qazaqmys korporasıasy» JSHS Turaqty damý jáne komýnıkasıalar jónindegi basqarýshy dırektor Sáken Shaıahmetov.
Bastapqy kezeńde kópir «Shatyrkól» kenishiniń óndiristik logıstıkasy úshin paıdalanylyp, Birlik temirjol stansıasyna júk tasymaldaǵan.
Keıin óndiristik logıstıka ońtaılandyryldy. «Shatyrkól» baıytý fabrıkasy iske qosylǵannan keıin shıkizat tikeleı ken ornynyń ózinde óńdeletin boldy. Qazirgi kezde kópir arqyly tek daıyn konsentrat tasymaldanady. Jol qozǵalysynyń qarqyny aıtarlyqtaı azaıdy.
Ónerkásiptik júktemeniń azaıǵanyna qaramastan, kópir qoǵamdyq mańyzyn saqtap qaldy. Ol jaqyn mańdaǵy eldi meken turǵyndary men tranzıttik avtokólik quraldary úshin qoldanylady. Sondaı-aq bul nysan temirjol ótkeli mańyndaǵy negizgi kólik torabynyń biri bolyp qala beredi.
Qurylysty qaıta jańǵyrtý kólik qozǵalysy qaýipsizdigin arttyryp, kópirdiń senimdiligin qamtamasyz etti. Ony turaqty jáne uzaq ýaqyt paıdalaný úshin barlyq jaǵdaı jasaldy.
Jobany júzege asyrý Qazaqmystyń óńirlik ınfraqurylymdy damytýǵa jáne óndiristik úderis pen turǵyndardyń kúndelikti qozǵalysynyń qaýipsizdigin qamtamasyz etýge degen kózqarasyn kórsetedi.
