جامبىل وبلىسىنىڭ شۋ اۋدانىندا «شاتىركول» اپاتتىق سۋ اعىزۋ كانالى ارقىلى وتەتىن كوپىر قايتا جاڭارتىلىپ، پايدالانۋعا بەرىلدى. كوپىر دىنمۇحامەد قونايەۆ اتىنداعى اۋىلدان بىرلىك اۋىلىنا قاراي باعىتتالعان تەمىرجول وتكەلىنىڭ جانىندا ورنالاسقان، دەپ حابارلايدى Dalanews.kz.
كوپىر قۇرىلىسىنىڭ اپاتتى جاعدايىنا بايلانىستى «قازاقمىس» كورپوراسياسى ونى جاڭعىرتۋ تۋرالى باستاما كوتەردى. جوبانىڭ نەگىزگى مىندەتى – كولىك جانە تەمىرجول ينفراقۇرىلىمى ايماعىندا اۆتوكولىكتىڭ ءقاۋىپسىز ءارى تۇراقتى قوزعالىسىن قامتاماسىز ەتۋ. جۇمىستىڭ جالپى قۇنى 360 ملن تەڭگەنى قۇرادى. جوبا جەرگىلىكتى اتقارۋشى ورگاندارمەن بىرلەسىپ جۇزەگە اسىرىلدى.
«ءبىز مۇنداي نىساندارعا تەك وندىرىستىك قاجەتتىلىك رەتىندە ەمەس، الدەقايدا اۋقىمدى تۇرعىدان قارايمىز. كوپىر اۋدان تۇرعىندارى بەلسەندى پايدالاناتىن جولدا ورنالاسقان، سوندىقتان ونىڭ جاعدايىن باعالاۋ كەزىندە باستى نازار ادامداردىڭ قاۋىپسىزدىگىنە جانە ينفراقۇرىلىمدىق تاۋەكەلدەردى ازايتۋعا اۋدارىلدى»، – دەدى «قازاقمىس كورپوراسياسى» ج ش س تۇراقتى دامۋ جانە كوممۋنيكاسيالار جونىندەگى باسقارۋشى ديرەكتور ساكەن شاياحمەتوۆ.
باستاپقى كەزەڭدە كوپىر «شاتىركول» كەنىشىنىڭ وندىرىستىك لوگيستيكاسى ءۇشىن پايدالانىلىپ، بىرلىك تەمىرجول ستانسياسىنا جۇك تاسىمالداعان.
كەيىن وندىرىستىك لوگيستيكا وڭتايلاندىرىلدى. «شاتىركول» بايىتۋ فابريكاسى ىسكە قوسىلعاننان كەيىن شيكىزات تىكەلەي كەن ورنىنىڭ وزىندە وڭدەلەتىن بولدى. قازىرگى كەزدە كوپىر ارقىلى تەك دايىن كونسەنترات تاسىمالدانادى. جول قوزعالىسىنىڭ قارقىنى ايتارلىقتاي ازايدى.
ونەركاسىپتىك جۇكتەمەنىڭ ازايعانىنا قاراماستان، كوپىر قوعامدىق ماڭىزىن ساقتاپ قالدى. ول جاقىن ماڭداعى ەلدى مەكەن تۇرعىندارى مەن ترانزيتتىك اۆتوكولىك قۇرالدارى ءۇشىن قولدانىلادى. سونداي-اق بۇل نىسان تەمىرجول وتكەلى ماڭىنداعى نەگىزگى كولىك تورابىنىڭ ءبىرى بولىپ قالا بەرەدى.
قۇرىلىستى قايتا جاڭعىرتۋ كولىك قوزعالىسى قاۋىپسىزدىگىن ارتتىرىپ، كوپىردىڭ سەنىمدىلىگىن قامتاماسىز ەتتى. ونى تۇراقتى جانە ۇزاق ۋاقىت پايدالانۋ ءۇشىن بارلىق جاعداي جاسالدى.
جوبانى جۇزەگە اسىرۋ قازاقمىستىڭ وڭىرلىك ينفراقۇرىلىمدى دامىتۋعا جانە وندىرىستىك ۇدەرىس پەن تۇرعىنداردىڭ كۇندەلىكتى قوزعالىسىنىڭ قاۋىپسىزدىگىن قامتاماسىز ەتۋگە دەگەن كوزقاراسىن كورسەتەدى.
