Ogaidyń ózi jańa basshyny tanystyrý kezinde Nurievtiń jas maman bolsa da tájiribesi jetkilikti ekenin aityp, jaqsy nátije kórsetetinine senim bildirgen.
Eńbek ujymy aldynda óziniń izbasaryn tanystyra otyryp, Edýard Ogai mundai sheshim Qazaqmys kompaniiasynyń júregi bolyp otyrǵan jańa Ulytaý oblysynyń qurylýyna bailanysty týyndaǵanyn atap ótken.
“Nurahmet Qanatuly Jezqazǵanda jumys isteitin bolady jáne ortalyq keńse osynda ornalasady. Biz Jezqazǵan qalasynda bolamyz jáne kompaniianyń sheshim qabyldaý ortalyǵy da osynda bolady. Nurahmet Qanatuly jas maman bolsa da, tájiribesi jetkilikti jáne ol bizden de jaqsy nátije kórsetedi”, –degen Edýard Ogai.
Nurahmet Nuriev óz kezeginde qyzmetkerler men óndiristik ujym aldynda kórsetken joǵary senimi úshin basshylyqqa alǵysyn bildirip, kompaniianyń qundylyqtary men maqsattaryna adaldyǵyn, sondai-aq oblysty damytý jáne eldiń joǵary basshylyǵymen Jańa, Ádil Qazaqstan qurý jónindegi ortaq ustanymyn bildirgen.
Qazaqmys – taý-ken ónerkásibi men tústi metallýrgiiamen ainalysatyn kásiporyn. Korporatsiianyń negizgi paketi qazaqstandyq milliarder Vladimir Kimge tiesili. Al ótken 16 jylda ony Edýard Ogai basqaryp keldi.
Al Nurahmet Qanatuly sekildi shetelde alǵan bilimi men ozyq tájiribesi bar jas mamannyń laýazymdy orynǵa taǵaiyndalýyna úlken úmit artatyndar kóp. 1989 jyly týǵan Nurahmet Nuriev Ulybritaniiada Angila Ruskin University-de iskerlik ákimshilendirý magistr dárejesin alǵan.
“Men jastarǵa senemin!”
Sonymen qatar osy 30 jyldyń ishinde qazaq basshynyń kelýi kompaniianyń tarihynda alǵash ret bolyp otyrǵanyna nazar aýdara ketkenimiz jón.
Prezident Qasym-Jomart Toqaevtyń ózi inaýgýratsiia rásiminde ozyq oily jastardy maqtan tutatynyn aityp, bolashaǵynan úmit kúttiretin mamandardy qoldaýǵa shaqyrǵan.
“Biz basqalardyń jasaǵanyn paidalanýmen ǵana shektelmei, álemge ózimizdiń jańalyqtarymyz ben jetistikterimizdi kórsetýimiz qajet. Al bul úshin halqymyzdyń áleýeti de, talanty da tipti óneri de jeterlik. Men bizdiń qabiletti de ozyq oily jastarymyzdy maqtan etemin. Sol sebepti aqyn Maǵjan Jumabaevtyń “Men jastarǵa senemin!” degen óleń joldaryn qaitalaýǵa ázirmin. Jastardy bárimiz qoldaýymyz kerek. Sebebi elimizdiń jarqyn bolashaǵyna jol ashatyn – osy jastar”, – degen edi Toqaev.
Jaýapkershiligi úlken orynǵa taǵaiyndalǵan Nurahmet Nurievtiń eńbek tájiribesi de mol. 2011-2013 jyldar aralyǵynda Hamble Group kompaniiasynda qarjylyq taldaýshy bolyp jumys istegen.
2013-2015 jyldary Pavlodar jáne Atyraý qalalarynda munai óńdeý zaýyttarynyń qurylymdyq bólimshelerinde jumys istedi.
Al 2015-2019 jyldary "Maikýben Vest" JShS jáne "Shubarkól Premiým" AQ kómir óndirýshi kásiporyndarynda qarjy direktory, Bas direktordyń korporativtik damý jónindegi orynbasary qyzmetin atqarǵan.
2019 jyldan 2020 jylǵa deiin "Intergaz Ortalyq Aziia" AQ Taraz ÝMG filialy direktorynyń orynbasary, "QazTransGaz" AQ tarifter jáne investitsiialyq saiasat departamenti direktorynyń orynbasary bolǵan.
Al korporatsiiadaǵy eńbek jolyn 2020 jyly jobalaý tobynyń basshysy qyzmetinen bastady. Sol jyldyń qyrkúiek aiynan bastap "Qazaqmys korporatsiiasy" JShS aýtsorsing jónindegi direktory qyzmetin atqaryp keldi.
2021 jyldyń maýsym aiynda Nurahmet Nuriev "Qazaqmys Smelting" JShS Bas direktory bolyp taǵaiyndaldy.
